Serbski gymnazij Budyšin swój pjaty nalětni volleyballowy turněr wotměł

Pedagogojo gymnazija druhi raz dobyćer

Po 32. Sokołskim turněrje wo pokal Domowiny srjedź měrca slědowaše nětko dalše wubědźowanje při wysokim saku, a to turněr wo pokal spěchowanskeho towarstwa Serbskeho gymnazija Budyšin (SGB). Je to jónkrótnosć we Łužicy, zo wojuja serbscy volleyballisća prawidłownje na šěsć turněrach wo jednotliwe dypki. Minjenu srjedu powita zamołwity tuteho wječora, sportowy wučer SGB Měrko Korjeńk, pjeć cyłkow do sportoweje hale tamnišeho šulskeho a zetkawanskeho centruma. Zwjeselace bě wobdźělenje mnohich młodostnych a třoch volleyballistkow na pjatym jubilejnym turněrje. Škoda, zo njeběchu abiturienća lěta 1996 pódla, dobyćerjo minjeneju lět.

SGB-wučerjo.JPG Scena_1.JPG Scena_2.JPG

K foće: Pjaty nalětni volleyballowy turněr Serbskeho gymnazija Budyšin dobychu pedagogojo tamnišeho kubłanišća. Na wobrazu widźimy hrajnu scenu mjez šulerjemi 12. lětnika SGB, w nadběhu Syman Lebza, a mustwu z Worklec.
(hrajna scena 1 a 3) abo (hrajna scena 2)
…..hrajnu scenu mjez SJ Chrósćicy a Radworskej Meju..

Tradicionelnje hraješe kóždy přećiwo kóždemu dwě sadźbje hač do 15 dypkow. Jednotliwe partije běchu jara wurunane, z dźesać skónči so pjeć njerozsudnje. A hakle w poslednim rozestajenu turněra zwěsći so nowy pokalny dobyćer. Lěpše wuhlady mějachu gymnazijalni kubłarjo, wšako jim njerozsudnje dosahaše. Ale z jasnym 2:0 bychu sej Worklečenjo k druhemu razej pućowanski pokal zawěšćeli. Tak běštaj referendar Ludwig Eckert na jednej stronje a nan Mato na tamnej wosebje motiwowanaj. Najpjedy wjeseleše so starša generacija Eckertec swójby, jako přesadźichu so Worklečenjo přećiwo SGB z 15:12. Tola w druhej sadźbje běchu nadaća a nadběhi gymnazijalnych volleyballistow sylniše, štož wjedźeše k jasnemu 15:9 za nich. Tak zešlachći so jim po lěće 2009 k druhemu razej dobyće pokala. Třeće městno wudoby sej najmłódše mustwo turněra, 12. lětnik SGB. Za wosebitu furoru postarachu so młodostni na Sokołskim turněrje, jako swojich wučerjow 2:0 porazychu a na kóncu respektne 8. městno wobsadźichu (SN wo tym rozprawjachu). Na tutym wječoru so jim generalka njeporadźi, wotedachu wobaj přechodaj z 12:15 a 10:15 na pedagogow. Tradicionelnej kónčnej bojaj při saku a w kopańcy hišće sćěhujetaj. Cyłk Radworskeje Meje zawostaji znowa sylny začisć, tež hdyž lětsa bronzowe městno snadnje misnje. Chrósćenjo zakónčichu turněr z 1:7 dypkami na pjatym městnje. Woni njetrjebaja zrudni być, njech hladaja hižo dźensa optimistisce do nazymy, hdyž chcedźa so prěni raz na dypkowych hrach w miksowej hobbyjowej ligi Budyskeho wokrjesa wobdźělić. Wšitkim mustwam słuša wutrobny dźak za wulkotnu sportowu atmosferu na hrajnišću a tež pozdźišo při mytowanju dobyćerjow.

            Kónčna tabulka

      
  1. Serbskij gymnazij wučerjo

7:1 dypki

      
  1. Mustwo Worklecy

5:3 dypki

      
  1. Serbski gymnazij-12.lětnik

4:4 dypki

      
  1. Meja Radwor

3:5 dypki

      
  1. SJ Chrósćicy

1:7 dypki