Duelaj při wysokim saku so njerozsudnje skónčili

Hdyž so šulske lěto nachila, hrajetej sportowej dwubojej mjez wučerjemi a so rozžohnowacymi abiturientami hižo lěta wažnu rólu. Je rjana tradicija na Serbskim gymnaziju, zo woni we volleyballu a w kopańcy hišće raz mocy měrja. Hrě při wysokim saku skóčištej so minjenu wutoru popołdnju při tropiskich temperaturach w sportowej hali Serbskeho šulskeho a zetkawanskeho centruma njerozsudnje. Wučerki přěhrachu z 0:3 a wučerjo přesadźichu so snadnje z 2:1. Volleyballistki woswjećichu z pjatym sportowym duelom małki jubilej. Prěnje rozestajenje žónskich wotměwa so hižo 20.junija 2005. Dotal je stajnje młódša generacija dobyła, čemuž tež lětsa tak bě. Z 25:19, 25:18 a 25:17 rozsudźichu abiturientki wšě tři sadźby za sebje. Partija pak njebě jednostronska. W prěnim a druhim přechodźe nawjedowachu maturantki jeno z 19:18 a 18:17. W tutym wokomiku běštaj wobaj fanowaj blokaj njesměrnje aktiwnaj. Wonaj postaraštaj so we wšitkich sadźbach wo dobru nahladu. Na kóncu falowaštej wučerkam/referendarkam trěbna koncentracija a tež tróšku zboža.

VB 2014 wucerjo-12.JPG VB wucerki-12.JPG

.

Přiwšěm wšitkim hrajerkam wulki kompliment za jich angažement na hrajnišću, kotryž so po duelu ze škleńčku sekta mytowa. Slědowaše dalši wjeršk. Mužojo běchu na rjedźe. Hakle njedawno běštej wobě muskej mustwje přećiwo sebi hrałoj. Při turněrje wo pokal spěchowanskeho towarstwa Serbskeho gymnazija dobychu wučerjo wobaj přechodaj (SN wotym rozprawjachu). Abiturienća běchu pak při 32.Sokołskim turněrje z 2:0 wuspěšni. Tak bě motiwacija pola wšitkich aktiwnych wot spočatka data. W nimoměrje napjatej a za wobě mustwje na wurjadnym niwowje stejacej hrě zamóchu pedogogojo prěnjej sadźbje snadnje z 25:22 za sebje rozsudźić. Dwanatkarjo mějachu lěpši start a hač k 20:18 stajnje nawjedowachu. Na kóncu falowaše jim w rozsudnych fazach trěbna rutina. Přihladowarjo widźachu tež w poslednim přechodźe rjane akcije při saku. A při stawje 23:23 bě napjeće pola wšitkich hrajerjow njesměrnje wulke. Dwaj indiwidualnej zmylkaj wučerjow pomaštej zasłuženemu dobyću sadźby našim lětušim maturantam. Ze zhromadnej bjezsadu při škleńcy piwa skónči so napinace, ale njezabyte popołdnjo za volleyballistow SGB.