Druha najwyša poražka za wučerjow

Předznamjenja 21. tradicionelneho koparskeho dwuboja mjez wučerjemi a maturantami běchu pola pedagogow wšitko druhe, hač optimalne. Wobaj škitarjej, šulski nawoda René Wjacławk a sportowy wučer Jan Hrjehor, falowaštaj a za Michała Eiselta bě partija po wosom mjeńšinach ke kóncej, dokelž so při zhibadle na prawej noze zrani. Tak zaskoči za njeho Uwe Barchmann, kotryž po přebytku w chorowni hišće fit njebě. Mustwo kompletowachu Konrad Lipič jako wrotar, Maćij Čižank a referendar Ludwig Eckert w škiče a Měrko Korjeńk w nadběhu.

hrajna scena 1 wučerjo-12.JPG kopańca wučerjo-12.JPG

Při tropiskich temperaturach nad 30°C njebě žadyn kolega za wuměnu. Na tamnej stronje dźesać agilnych, wysoko motiwowanych abiturientow, kotřiž běchu wot spočatka atletisce spěšniši a technisce lěpši. Tak běchu mnoho wrotow garantowane a z 9:2 zešlachći so lětušim maturantam druhe najwyše dobyće w stawiznach koparskich duelow na Serbskim gymnaziju. Hižo w druhej mjeńšinje we wrotach wučerjow zaklinka, jako Feliks Zahrodnik z Chrósćic při srjedźnej linije startowa a z něhdźe sydom metrow zadyri jeho mócna třělwa w klětce pedogogow.

.

Tři mjeńšinje pozdźišo reagowa samsny hrajer na wopačny pas wučerjow najspěšnišo, wuhra hišće wrotarja a suny bul přez liniju k 2:0. Sćěhowaše klasiski konter dwanatkarjow, kotryž Clemens Mark z Noweho Łusča krótko do połčasa zymnokrejnje wuži. Dalše wrota hižo njepadnychu, tak bě mjezywuslědk 0:3 z wihda wučerjow hišće znjesliwy. A jako sudnik Jurij Haška z 11. lětnika partiju znowa zahwizda, njetraješe dołho a dwanatkarjo zwyšichu přez serbskeho triatleta Daniela Matku z Lejna na 4:0. Sćěhowaštej dalšej wroće w dwumjeńšinowym takće. Suwerenje wuhrataj konteraj z dwójnymi přihrawkami přetwori najprjedy Fabian Šěrak z Radworja k 5:0 a potom Richard Hawš z Pančic-Kukowa k 6:0. Po 23 mjeńšinach cyłkowneho hrajneho časa móžachu skóčnje wučerjo juskać. Róžkowy kop Maćija Čižanka wotwobara dobry wrotar maturantow Pětr Kmječ z Chrósćic pře krótko a z kopom do praweho delnjeho kuta skrótši Měrko Korjeńk na 1:6. A hlej, přichodne wrota zmištrowachu znowa pedogogojo. Dwě mjeńšinje do kónca wuži Ludwig Eckert njedorozumjenje šulerskeho škita na 2:6. Ale z přichodnym nadběhom maturantow bě wurjadny hrajer Feliks Zahrodnik k třećemu razej wuspěšny, jako preciznu flanku Fabiana Šěraka do lěweho delnjeho róžka sunje. Po regularnym hrajnym času z 30 mjeńšinami zwyšištaj Daniel Matka a znowa Feliks Zahrodnik w běhu 60 sekundow rezultat wo wroće.

Tak skónči so 21. koparski duel z wuslědkom 9:2 za maturantow. Je to jich pjatnate dobyče, trójce hrajachu njerozsudnje a tři króć juskaše starša generacija. Po sportowanju přeprosy domownik Uwe Jünger wšitkich akterow na gulašowu poliwku. Tomu přizamkny so zhromadne popołdnjo z lóštnej bjezsadu.

hrajna scena 2 wučerjo-12.JPG hrajna scena 3 wučerjo-12.JPG hrajna scena 4 wučerjo-12.JPG