Parcour

Srjedu, dnja 3. februara 2016, wotmě so parcour z wšelakimi stacijemi, na kotrymž wobdźělištaj so wobaj 8. lětnikaj. Na započatku zetkachmy so wšitcy w jednej rumnosći a rozdźělichmy so do štyrjoch skupinow. Naša skupina zaběraše so na započatku z kurjenjom. Tam běchu wulke cigarety, kotrež móžachmy wočinić a w nich běchu prašenja, kotrž w skupinje diskutowachmy. Jako přichodne dźěchmy k staciji “Jědźne mylenja”, hdźež dyrbjachmy zwěsćić, hač su wuprajenja prawe abo wopak. Po krótkej přestawce wjedźeše naš puć k staciji “Alkohol”. Tule stajichmy sej nawoči, z kotrymiž widźachmy swět z wida alkoholizowaneho. Při tym dyrbjachmy hišće někotre nadawki spjelnić, n. př. na runej liniji běžeć abo z nikim “Frisbee” hrać, štož nam wšitko ćežko padnješe. Jako poslednje informowachmy so z jednej hru wo nowych medijach. Naposledk zetkachmy so zaso wšitcy hromadźe a wuhódnoćichmy tutón projekt, kiž je so nam jara lubił. Dźakujemoj so wosebje knjeni Pröhlowej, kiž je tutón projekt nawjedowała a pomocnikam knjeni Wićazowej, knjezej Friedrichej a knjezej Eiseltej.