Studijny dźeń 11tkow

Tójšto informacijow za studij dóstali - studijny dźeń 11.lětnika

Jako druhi dźěl orientaciskich dnjow za nas 11tkow Serbskeho gymnazija bě pjatk, 24.11.2017, studijny dźeń předwidźany. Tydźenjej do toho běchmy hižo tójšto informacijow wo studowanju wot knj. Klingstoweje wot dźěłoweho zarjada dóstali. Tutón pjatk pak chcychmy dokładnišo wo konkretnych studijnych směrach zhonić.

Dźeń započinaše so z přednoškom knjeza Bosćija Handrika wot kubłanskeje agentury, w kotrymž wšitkich, kiž so za wučerstwo zajimowachu, pohnuwaše tutym zajimje šćehować. Dramatiske pobrachowanje wučerjow w Sakskej mjenujcy tež nas potrjechi. Tak du w přichodnych lětach wjac hač 90 serbskorěčnych wučerjow na wuměnk, ličba serbskich studowacych na polu wučerstwa je pak wo wjele mjeńša. Tak apelowaše na wšitkich, sej hišće raz přemyslić, hač nochcychu so tola jako wučerjo wuspytać.

Hnydom po krótkej přestawce so wšitcy do małkich skupinow dźělachu. Tute běchu rjadowane po indiwiduelnje wolenych workshopach. Tam čakachu na šulerjow małe informaciske přednoški. Cyłkownje běchu to wosom wšelakich, wot kotryž móžachu so dwě wot kóždeho šulerja wopytować. To běchu na přikład pisanje motiwaciskeho lista a požadanja, kaž tež organizacija studija.Dale přewjedźe so asesment, informowaše so wo “přechodnych” móžnosćach. We rumnosćach předstajichu so tute wot studentow, kaž tež wot hižo we wšelakorych powołanjach nazhonitych prjedawšich studentow. Cyłkownje su so jara dobre pokiwy daledawali a so prěni zaćišć wo žiwjenju studenta stworił. Tež su so šulerjo sami wuspytać móhli, kaž na přikład při přemyslenju wo swójskich zamóžnosćach abo wo namakanju swójskeje motiwacije za studij. Tež prašenja šulerjow běchu wosebje witani a so rady, dokładnje a wobšěrne wotmołwichu.  

k-IMG_2510.JPG k-IMG_2515.JPG k-IMG_2542.JPG k-IMG_2552.JPG  

Potom skiči so nam hišće móžnosć, so ze studentami rozmołwjeć. Tute su so po jich studijnym směrje na jědnaće blidow zesydali. W skupinkach dźechmy wot jedneho blida k druhemu, wot wučerstwa k medicinje hač k ratarstwu. Ze studentami rozmołwjachmy so wo najwšelakorišich temach, hač běše to jich studijny směr, financowanje studija abo studijne žiwjenje. Tak skiči so nam móžnosć, sej wšelake studijne směry spřistupnić a pola studentow naše prašenja wotbyć, kotrež ći hewak nichtó wotmołwić njeje móhł.

Po zakónčenju oficjelneho dźěla mějachmy hišće raz móžnosć so na studentow wobroćić, na kotrež hišće indiwiduelne prašenja mějachmy. Tak bě kóždy z nas z wědu wo studijnych směrach, powabjenjach, abo uniwersitach nakopjeny a dowolichmy skónčnje wućerpanym studentam so domoj nawróćić.

Wutrobny dźak na tutym městnje wšitkim, kiž su wulkotny dźeń za nas při- a wuhotowali!

Halina Pohončec, Johanna Šmidtec, Weronika Šnajdrec