12tki w testach wuspěšni

Šulske lěto dwanatkow so pomału ke kóncej chila a tak dyrbja so za studij abo wukubłanje rozsudźić, kotrež potom w nazymje započinaja.

Za wukubłanja a někotre studijne směry dyrbja so w předpolu tak mjenowane testy za zwěsćenje kmanosćow přewjesć (němsce Eignungstest). Chorobna kasa AOK PLUS poskića 12tym lětnikam gymnazijow we wokrjesu Budyšin tajki test k wuspytanju. Zdobom je to wubědźowanje mjez so wobdźělacymi gymnazijemy. Tež 12tki Serbskeho gymnazija so wobdźělichu. Po dołhim čakanju na wuslědki potom zhonichu: Wšitcy šulerjo wotrěznychu z jara dobrym wuslědkom. Maximilian Bělk běše najlěpši ze wšěch. Wón docpě 89,43% móžnych dypkow. Gratulacija!

Ale to njeje hišće wšo. Jako najlěpši cyłeho wokrjesa z přerěznje 80% dypkow wudobychu sejbi pjenježne myto we wysokosći 250€. Z tymi chcedźa nětko jich maturitny bal sobu financować.

.