Chórowe lěhwo 2016

Dźěłaj a spěwaj – chórowe lěhwo 2016 w Hejnicach

Jako swjećachu druzy młodostni hišće sylnje póstnicy w Kulowje, podachu so hólcy a holcy chóra 1. serbskeje kulturneje brigady do proboweho lěhwa. Wot róžoweje póndźele přebywachu za to mjeztym hižo dźesaty raz štyri dny w Mjezynarodnym duchownym centrumje w čěskich Hejnicach. Něhdyši klóšter skića z rjanym hotelom a wulkej awlu kaž tež dalšimi rumnosćemi optimalne wuměnjenja za zwučowanje. Nawoda chóra Friedemann Bejma wujasni šulerjam na prěnjej probje wažnosć přichodnych dnjow, wšako tworja tute zakład za lětuše koncerty chóra. Tuž dyrbjachu so tójšto nowych spěwow nazwučować. Za to bě dirigentej tež sopranistka Tanja Donatec ke pomocy, kiž přewjedźeše ze šulerjemi hłósne zwučowanja.

Po wuspěšnych probach pak móžachu so šulerjo wězo tež na zabawny swobodny čas wjeselić. Póndźelu přewjedźechu zhromadźiznu brigady, prjed hač hrajachu wšitcy zhromadnje wšelake hry. Wutoru nawječor zběhaše so lóštne juskanje přez dom, wšako běchu dirigent a zamołwita wučerka za brigadu, Sylwija Rječcyna, na póstnicy prosyli. Po zhromadnych serbskich rejach přez chódby poda so swjedźenski ćah kostiměrowanych norow do žurle. Tam sćěhowaše lóštny a pisany program jednotliwych šulerskich skupinow. Hač reja, spěw, hra abo skeć wo probje chóra – młodostni wopokazachu so jako jara kreatiwni. Program so wšitkim zespodoba, a wšitcy swjećachu nimale hač do połnocy. Potom zaćahny měr, wšako započinaše so póstny čas. Tohodla rozsudźichu so šulerjo, zo chcedźa srjedu Božu mšu w znatej bazilice sobu wuhotować, a wječor z filmom wuklinčeć dać.

Po štwórtkownišej probje zanjese chór hišće dźaknu štučku za kucharjow, prjed hač podachu so na dompuć. Dirigent chwaleše sej disciplinu a kmanosće šulerjow, wšako běchu wšitke nowe twórby nawuknyli. Tute zaklinča potom w aprylu na nalětnimaj koncertomaj, a to 09.04. w Budyskej piwarni a 10.04. w Ćisku.

k-P1060825.JPG