Jědnatkarjo SGB dwójce wuspěšni

Mixvolleyballisća 11. lětnika Serbskeho gymnazija Budyšin (SGB) skónčichu lěto z docpěćom finala abi-cupa 2017 a dobyćom adwentneho turněra na serbskim kubłanišću.

Tydźeń do hodownych prózdnin přeprosychu so šulerki a šulerjo 11. a 12. lětnika Budyskich gymnazijow kaž tež Powołanskej šuli za techniku a hospodarstwo do tamnišeje noweje sportoweje hale, zo bychu prěni raz wuhrali mixowy abi-cup. Wosom měšanych cyłkow, wobstejo z dwěmaj holcomaj a štyrjomi hólcami, hrajachu najprjedy w dwejoch staflach wo najlěpše zaměstnjenje. Naši dwanatkarjo skónčichu turněr na 5. městnje a jědnatkarjo docpěchu finale, kotrež snadnje z 11:15 a 13:15 přećiwo 12. lětnikej Schilleroweho gymnazija přěhrachu. Jich wulkotnu formu wopodstatnichu někotre dny pozdźišo při tradicionelnym adwentnym volleyballowym turněrje w sportowej hali Serbskeho šulskeho a zetkawanskeho centruma Budyšin. Woni přesadźichu so najprjedy přećiwo 10. lětnikej z 25: 10 a 12. lětnikej z 25:20. Sćěhowaše brizantny wukónc sadźby přećiwo swojim wučerjam, kotřiž  z 24:23 nawjedowachu. Na turněrje hraješe kóždy přećiwo kóždemu jedyn přechod hač do 25 dypkow a na hrajnišću dyrbjachu stajnje tři holcy resp. tři wučerki stać. Tola jědnatkarjo z kapitanku Sophie Hejduškec snadny zastatk zwjertnychu a z poslednim mócnym nadběhom Dawida Wowčerja sadźbu k 25:24 skónčichu. Tež partija wo třeće městno bě napjata, kotryž doby 12. lětnik z 25:21 přećiwo wučerjam. Kompliment słuša najmłódšim volleyballistam 10. lětnika za jich angažement na hrajnišću. Připóznaće tež sudnikaj turněra, Heleny Hejduškec a Feliksej Cyžej, kotrajž měještaj ferne partije stajnje pod kontrolu. Wonaj kaž tež kóžde mustwo dósta po wubědźowanju wosebity pokal w formje šokoladźaneho rumpodicha.

Zestawa dobyćerskeho mustwa 11. lětnika: Sophie Hejduškec, Luiza Šubertec, Judit Wićazec, Dawid Wowčer, Fabian Hejduška, Kito Mark a Nick Warnecke.

SGB-VB adwentny mixturněr 2017

K foće: Wjele wjesela na swojim adwentnym volleyballowym turněrje mějachu minjeny pjatk wučerjo a šulerjo 10. do 12. lětnika Budyskeho Serbskeho gymnazija.

Naši volleyballisća so we wokrjesu suwerenje přesadźili

W Biskopicach započachu so wokrjesne wurisanja we volleyballu w ramiku “Młodźina trenuje za olympiju”. Pola holcow kaž tež pola hólcow běchu pjeć šulow pódla a to w starobnej skupinje II (9. do 11.lětnik). Naše volleyballistki, třeće sakskeho finala minjeneho šulskeho lěta, so we wšitkich partijach suwerenje z 2:0 přesadźichu a pojědu nětko 11. 01.2018 na regionalne finale do Rychbacha pola Lubija. Tež naši hólcy tam pojědu, dokelž dobychu finale přećiwo Goethowemu gymnazijej Biskopicy z 2:1 (16:14, 13:15, 15:13). Před lětom přěhrachu wobej sadźbje snadnje z 23:25. Tak bě wjeselo wokoło kapitana Dawida Wowčerja wosebje wulke. Přejemy našim volleyballistam we wuchodosakskim finalu wjele wuspěcha.

SGB-VB-2017_KF_WkII.JPG

K foće: Naši wuspěšni volleyballisća pojědu spočatk januara na regionalne finale do Rychbacha pola Lubija, hdźež budu wo jednu medalju wojować.

SGB-koparjo so za Sakske finale kwalifikowali

W Rakecach wotmě so štwórtk, 28.09.2017 regionalne finale w kopańcy a to w starobnej skupinje II. Naše hólcy 9. do 11. lětnika nastupichu w najsylnišej zestawje a dobychu přećiwo Gymnazijej Wodowe Hendrichecy z 2:0 a hišće jasnišo přećiwo WŠ Rotenburg z 6:1. Partija na trawniku přećiwo Foucault gymnazijej Wojerecy skónči so njerozsudnje 1:1. W rjadach Serbskeho gymnazija běštaj z třomi wrotami kapitan Dawid Šołta a Richard Paška najwuspěšnišaj třělcaj. Jara wurunany cyłk pojědźe w meji 2018 na krajne finale do Lipska.

SGB-FB_2017_RF_WkII_1.jpg

K foće: Koparjo SGB po mytowanju ze złotej medalju na sportnišću w Rakecach.

              Foto je wot: Guntharta Symmanka

Dobyće we wokrjesnym finalu

Dnja 15.09.2017 wotmě so wokrjesny finale w kopańcy starobneje klasy hólcy II „Młodźina trenuje za olympiju“ na Młynkec łucy w Budyšinje. Po wuspěchu 1:0 přećiwo „Goethe-gymnaziju“ z Biskopic poradźi so našim hólcam dobyće z 6:0 přećiwo „Imanuel-Kant-gymnazijej“ z Wjelećina.

Regionalne finale wotměje so 28.09. w Rakecach.

1.JPG 2.JPG 3.JPG

Foto: D. Šołta, F. Matješk, P. Schmidt, R. Paška, F. Kola, J. Šołta, F. Schade, F. Jurk, St. Schröder, Ł. Bobka, J. Bobka, J. Kola, A. Mička

Młodźina trenuje za olympiju

We wurisanju "Młodźina trenuje za olympiju" su so koparjo Serbskeho gymnazija w starobnej skupinje II (9. do 11. lětnik) wutoru, 29.09.17, na Budyskej Młynkec łuce w předkole wokrjesneho finala přećiwo Goethewemu gymnazijej Biskopicy z 1:0 a přećiwo Melanchthonowemu gymnazijej Budyšin z 4:1 přesadźili.
Štyri najlěpše šule Budyskeho wokrjesa wojuja pjatk, 15.09.17, wo cyłkowne dobyće a z tym za kwalifikaciju za regionalne finale.
_MG_3189.JPG
K foće: D. Scholze, F. Matjeschk, P. Schmidt, R. Paška, F. Kahle, J. Scholze, F. Schade, A. Boradshiew,     F. Jurk, St. Schröder, L. Bobke, J. Kahle, A. Mitschke

Wučerjo dobudu jubilejny 25. volleyballowy duel

Prěni volleyballowy duel mjez wučerjemi a dwanatkarjemi wotměwa so na Serbskim gymnaziju Budyšin 09. nowembra 1992, kotryž šulerjo z 2:1 dobychu. Tradicija wubědźowanjow při wysokim saku wosta a tak dóńdźe na dnju dźěšća 01. junija 2017 k wosebitemu jubilejej. Pedagogojo a abiturienća wuhrachu k 25. razej swojeho dobyćerja. Wosebje prěnja sadźba bě brizantna. Přez 200 šulerjow pohonjowachu swojich dwanatkarjow w sportowej hali k dobyću. Ale wučerjo so po sylnym boju snadnje z 30:28 přesadźichu. Druhi přechod bě jasna naležnosć našich maturantow, kotryž so 25:16 skónči. Tak padnje rozsud w třećej sadźbje. Po jasnym sydom dypkowym nawjedowanju  za našich pedagogow so dwanatkarjo hišće raz mobilizowachu a na 22:24 znižichu. Tola přichodny dypk sej wučerjo k 25:22 wuwojowachu a tak jubilejny duel z 2:1 dobychu. Mjeztym dźewjaty volleyballowy duel mjez cyłkomaj wučerkow/referendarki a maturantkow skónči so 25:14 a 15:8 za młódšu generaciju.

SGB-VB 2017 L-12.JPG SGB-VB 2017 L-12.Sch..JPG

K foće: Po zromadnym sportowanju při wysokim saku nastupichu wučerki a wučerjo kaž tež naši maturantki a maturanća k zakónčacemu foće.