Volleyballisća Serbskeho gymnazija Budyšin w Dippoldiswaldźe wuspěšnje hrali

Znowa bronzowa medalja w sakskim finalu

Z połnym elanom podachu so hólcy 9. lětnika Serbskeho gymnazija Budyšin (SGB) minjeny štwórtk do Dippoldiswalde na Sakske finale we volleyballu. Woni běchu jedne z najlěpšich šěsć cyłkow starobneje klasy III našeho kraja. A zo na kóncu znowa bronzowa medalja wuskoći, je chwalby hódne.

3.Platz_für_SGB.JPG SA.-F.WkIII_Ehrung_2014.JPG SA.-F._WkIII_Eröffnung_2014.JPG

K foće: W sakskim finalu we volleyballu wubědźichu sej hólcy 9. lětnika Serbskeho gymnazija Budyšin w Dippoldiswaldźe znowa bronzowu medalju. Stejo wotlěwa: Tadej Handrik, Józef Hantuš, kapitan Tadej Cyž, prědku wotlěwa: Toni Rudolph, Maximilian Jurack a sportowy wučer Měrko Korjeńk.

.

Hižo před lětomaj docpěchu hrajarjo wokoło kapitana Mateja Cyža na samsnym městnje wulkotne třeće městno. Před tydźenjom bě samo slěbro móžne, ale w połfinalu podležachu w rozsudnej třećej sadźbje z 10:15 Werner-Heisenbergskemu gymnazijej Riesy. Naši hólcy běchu sej tójšto předewzali, a tak trenowachu na wjacorych pjatkach zhromadnje z volleyballistami abiturneho schodźenka. Wosebje při smjećowanju a w blokowanju so technisce wukmanichu, štož bě w Dippoldiswaldźe wažny zakład wobeju dobyći w předkole. „Serbska murja při saku“ je so za nadběhowarjow z Auerbacha a Oberwiesenthala husto jako njepřewinujomna wopokazała. Wobaj cyłkaj přěhraštaj partiju přećiwo wuchodosakskemu mištrej z Budyšina, a to z 1:2 resp. 0:2. Při turněrje hrajachu so dwě dobyćerskej sadźbje a stajnje štyri hólcy tworjachu mustwo na hrajnišću. W druhej stafli přesadźichu so suwerenje volleyballisća Sportoweho gymnazija Lipsk, kotrež tež wšitke dalše rozestajenja tutoho dnja jasnje z 2:0 za sebje rozsudźichu. Sportowi kontrahenća docpěchu přerěznje jenož 12 dypkow w jednotliwych přechodach. Bjez dźiwa, wšako hraja třo z Lipska hižo nětko w krajnej wubrance pod 18 lět. Jich hrajny niwow wotpowěduje wobwodnej lize mužow! Tutón je tež trjeba, zo bychu při kónčnych němskich mišterstwach w juliju přećiwo dobyćerjam dalšich zwjazkowych krajow wobstali. Ale wróćo k našim hólcam, kotrež w połfinalu prěnju sadźbu přećiwo gymnazijej Riesa z 18:25 přehrachu. Technisce dobri hrajarjo z Łobjoweho města běchu wosebje w pólnym škiće a při nadaćach ći lěpši. W druhim přechodźe so situacija změni. Nětko postajichu šulerjo SGB hrajny wotběh napjateje partije. Dźakowano sylnišich nadběhow a wuspěšnych blokow přesadźichu so z 25:18. Sćěhowaše rozsudna sadźba, kotraž bě hač k wosmemu dypkej wurunana. Škoda, zo popušći na kócu trěbna koncentracija. Po dźesać mjeńšinach radowachu Riesascy hólcy, mjeztym zo naši zrudnje hrajnišćo wopušćichu. Dokelž přěhrachu w druhim połfinalu gymnazijasća z Rudnych horin jasnje přećiwo Sportowej šuli Lipsk, dóndźe w hrě wo bronze znowa k rozestajenju SGB-Elitašula za zymski sport Oberwiesenthal. We volleyballu mamy přisłowo, kotrež tež husto přitrjechi: „Při turněrach so zrědka přećiwo samsnemu mustwu dwójce dobudźe“. Bohudźak nic na tutym dnju. Serbscy hólcy přesadźichu so w prěnim přechodźe z 25:19, trjebachu pak w druhim sylne čuwy za snadne 25:23. Sylnaj nadběhowrjaj a blokowarjaj Tadej Cyž a Józef Hantuš, suwereny přistajowar Maximilian Jurack, technisce dobry přijimar nadaćow Toni Rudolph a motiwowany wuměnowy hrajer Tadej Handrik, docpěchu z dobyćom bronzoweje medalje znowa grandiozny wuspěch za Serbski gymnazij Budyšin. Wutrobna gratulacija wšitkim pjeć hólcam.

Kónčna tabulka sakskeho finala hólcow

  1. Sportowy gymnazij Lipsk
  2. Gymnazij Werner-Heisenberg Riesa
  3. Serbski gymnazij Budyšin
  4. Elitašula za zymski sport Oberwiesenthal
  5. Wyša šula Artur-Becker Delizsch
  6. Wyša šula Geschwister Scholl Auerbach