Znowa bronza w krajnym wurisanju „Młodźina trenuje za olympiju“

Wosebite wuznamjenjenje za volleyballistow SGB

Po mytowanju dobyćerjow najmłódšich volleyballistow sakskeho finala minjeny štwórtk w Grimmje, sćěhowaše cyłkowne hódnoćenje najlěpšich šulow našeho kraja we wurisanju „Młoźina trenuje za olympiju“. Po wosebitym dypkowym systemje zličichu so rezultaty regionalnych a krajnych wubědźowanjow w tutej bulosportowej družinje. A jako hłowny zamołwity za volleyballowy sport w sakskej, knjez Karl-Heinz Rutke, jednotliwe šule přečita a na třećim městnje Serbski gymnazij Budyšin (SGB) mjenowa, so najprjedy holcy 6. a 7. lětnika a sportowy wučer Měrko Korjeńk dźiwachu. Bě to zaprajenje abo je so zamołwity mylił? Ně. Z dwěmaj złotymaj, dwěmaj slěbornymaj a jednej bronzowej medalju we wuchodosakskich finalach a z dwě bronzowej medalji w sakskim finale wobsadźi Serbski gymnazij wurjadne 3. městno w cyłkownej Sakskej! Kajki to grandiozny wuspěch volleyballistow 6. do 12. lětnika SGB. Wutrobna gratulacija wšitkim holcam a hólcam za tutón zawěšće jónkrótny rezultat. Tak je so kóžda přidatna kapka potu při popołdnišich treningowych jednotkach wupłaćiła. Dale tak. W cyłkownym hódnoćenju najlěpšich šulow wobsadźi gymnazij Wilkau/Haßlau blisko Šwikawy 2. městno a pućowanski pokal dósta za jedne lěto gynmazij Wernera Heisenberga Riesa.

Hižo někotre mjeńšiny do toho błyšćachu so wóčka našich volleyballistkow 6. a 7. lětnika nad dobyćom bronzoweje medalje. W małym finalu přesadźichu so přećiwo gymnazijej Engelsdorf z 2:0.

SA-F_WkIV_ Mä_Wo_ist_der_Ball..JPG SA-F_WkIV_Mä_3_Pl_ SGB.JPG SA-F_WkIV_Mä_Siegerehrung.JPG

K foće: W sakskim finalu we volleyballu wubědźichu sej holcy 6. a 7. lětnika Serbskeho gymnazija Budyšin w Grimmje bronzowu medalju. Stejo wotlěwa: Lea Krječmarjec, sportowy wučer Měrko Korjeńk, kapitanka Luiza Šubertec; prědku wotlěwa: Wibke Zickmüller, Tadeja Šeferec  a Luise Garbe.

.

Napjata bě wosebje prěnje sadźba, hdyž sportowy kontrahent hižo 23:22 nawjedowa. Ale hrajerki wokoło kapitanki Luizy Šubertec wobchowachu měr a přechod hišće z 25:23 za sebje rozsudźichu. To bě moraliski k.o. za volleyballistkow z Engelsberga, wšako přehrachu druhu sadźbu wysoko z 13:25. Štož potom sćěhowaše, bě njesměrna radosć wšitkich pjeć hrajerkow SGB. Luiza Šubertec, Lea Krječmarjec, Tadeja Šeferec, Wibke Zickmüller a Luise Garbe wuwojowachu sej   prěnju medalju za holcow serbskeho kubłanišća. To bě krótko do 15.00 hodźin. Započinało je so krajne finale starobneje klasy IV (5. do 7. Lětnik) za najlěpše šesć mustwa sakskeje hižo w dźesaćich. W předkole hraješe kóždy přećiwo kóždemu dwě dobyćerskej sadźbje a to w dwěmaj staflomaj. Zazběh za našich holcow bě optimalny. Woni njedachu gymnazijastkam z Oelsnitz blisko Plauena žanu šansu na dobyće, přesadźiwši so z 25:14 a 25:13 dosć jasnje. Dalše mustwo w stafli 1 bě pozdźiši finalist gymnazij Wernera Heisenberga Riesa. Hač do dwanateho dypka bě partija we woběmaj sadźbomaj wotewrjena. Tola na kóncu falowaše našim šulerkam trěbna koncentracija. Tak wjeselachu so Riesascy nad dwójnym 25:16. W połfinalu rěkaše naš přichodny kontrahent gymnazij Bernhard-von-Cotta Brand-Erbisdorf, dobyčer stafle 2. Woni dominawachu partiju wot spočatka hač ke kóncej z jasnym 25:10 a 25:12. W rjadach pozdźišeho sakskeho mištra hraješe wusahowaca volleyballistka, kotraž so na kóncu turněra jako najlěpša sportowča wuznamjeni. Ale tež naša kapitanka Luiza Šubertec z rjadownje 7-4 zawostaji wurjadny techniski zaćišć. To zwěšćištej tež trenarjaj volleyballoweho centruma holcow z Drježdźan. Luiza dósta přeprošenje za treningowe lěhwo najlěpšich hrajerkow našeho kraja. Znano wurosće raz serbska volleyballistka, kotruž widźimy za někotre lěta w 1. zwjazkowej lize žonow. Přejemy jej na tutym puću wjele wuspěcha.

Kóčne zaměstnjenje sakskeho finala holcow:

  1. Gymnazij Bernharda-von-Cotta Brand-Erbisdorf
  2. Gymnazij Wernera Heisenberga Riesa
  3. Serbskij Gymnazij Budyšin
  4. Gymnazij Engelsdorf
  5. Gymnazij Juliusa Mosena Oelsnitz/V.
  6. Wyša šula Böhlen