Koparki gymnazija w Großröhrsdorfje wuspěšnje hrali

Bronzowa medalja we wuchodosakskim finale

Po dobyću slěborneje medalje w sakskim finalu w juniju 2013 předewzachu sej koparki 5. do 7. lětnika Serbskeho gymnazija Budyšin (SGB) tydźenja tež we wyšej starobnej klasy 3 wuspěšnje wotrěznyć. Do Großröhrsdorfa dojědźechu sej šěsć holčich cyłkow z wuchodneje sakskeje, zo bychu we wobłuku šulskeho sportoweho wubědźowanja „Młodźina trenuje za olympiju“ regionalneho mištra zwěšćili.

FB-Wk_III_Mä_Reg-finale_2014.JPG FB-Wk_III_Mä_Regionalfinale.JPG

K foće: Koparki 5. do 7. lětnika Serbskeho gymnazija Budyšin docpěchu we wobłuku šulskeho sportoweho wubědźowanja „Młodźina trenuje za olympiju“ w regionalnym finale w Großröhrsdorfje bronzowu medalju. Stejo wotlěwa: Helena Hejduškec, Judit Pjetašec, Friederike Lehmannec, Tadeja Šeferec, Nele Pjetašec, Helena Šołćic, Weronika Krawcec, Karoline Schreiterec a kapitanka Lea Krječmarjec.

.

Tak hraješe kóždy přećiwo kóždemu a to stajnje 10 mjeńšinow. Na kóncu přesadźi so suwerenje Goethowy gymnazij Biskopicy, kotryž nastupi samo z jednej koparku krajneje wubranki. A přećiwo wysokemu faworitej pokazachu naše holcy jich najlěpši hrajerski wukon tutoho dopołdnja. Woni wojowachu wo kóždy kwadratny meter trawnika a docpěchu njerozsudne 0:0. Wrotarka SGB Nele Pjetašec z Pančic-Kukowa njeje jenož w tutym sportowym dwuboju, ale tež w dalšich štyrjoch partijach klětku ćiste dźeržała. Sćěhowaštej dalšej hrě bjez wrotow a dwě dobyći z 1:0. Tak wobsadźichu serbske koparki na kóncu bronzowe městno, štož je znowa rjany wuspěch. Woni běchu jedne z najmłódšich mustwow turněra. A samo slěbro bě móžne, ale přećiwo Gymnazijej Ferdinanda Sauerbrucha Großröhrsdorf a Lessingowemu gymnazijej Kamjenc njenamaka kulowata koža městno we wrotach. Hnydom wjacore šansy poskićachu so Tadeje Šeferec a Helene Hejduškec z Horow. 21. meja změje w stawiznach Serbskeho šulskeho a zetkawanskeho centruma wosebite městno. Prěni holči derby mjez koparkami SGB a Serbskeje wyšeje šule Budyšin (SWŠB), kotryž bě njesměrnje dramatiski. W prěnich mjeńšinach bě to hra na jedne wrota. Gymnazijastki wokoło kapitanki Leje Krječmarjec z Wulkeho Wjelkowa třělachu ze wšěch pozicijow, misnychu pak wrota snadnje. A skoro by klasiski konter přez najlěpšu hrajerku SWŠB Hanu Kühnelec we wrotach Nele Pjetašec zadyrił. Gymnazijastki hłuboko předychachu a so krótko do wothwizdanje wjeselachu, jako postara so Tadeja Šeferec z bliskeje distancy k zasłuženemu 1:0. Podobny bě wotběh posledneje partije SGB přećiwo Wyšej šule Mücka, kotraž so tohorunja z 1:0 skónči. Techniska a atletiska přewaha serbskich holcow mytowa so přez rjanu třelwu Helene Šołćic z Róžanta do delnjeho praweho kuta. Dobyće bronzoweje medalje ma tež swój zakład w systematiskim treningu w koparskej AG pod nawodom sportoweje wučerki Gabrieli Jendrewscynej. Wutrobny dźak za to. Naspomnić ma so hišće rezultat młódšeje starobneje klasy 4. Dokelž wotprajištej dwě šule swoje wobdźělenje, wubědźowaštej so sportowće SWŠB jeno z Gymnazijom F.-Sauerbrucha Großröhrsdorf. Zamołwity za turněr rozsudźi so za dwě hrě. Połčas traješe stajnje 10 minutow. Za serbskich holcow bě to prěni koparski turněr a tak běchu jara motiwowani. Hačrunjež skónči so duel na trawniku snadnje z 0:1, bě sportowy wučer Jan Hrjehor z wukonom a slěbornej medalju jara spokojom.