Matej Cyž – najlěpši volleyballist we wuchodosakskim finalu

Hólcy 10. lětnika SGB w Rychbachu sej wjace předewzali

Spočatk januara wotměła so w Rychbachu pola Lubija prěnje regionalne finale we volleyballu pod hesłom „Młodźina trenuje za olympiju“. Mjez štyrjomi najlěpšimi šulemi wuchodneje sakskeje běchu tež hólcy 10. a 11. lětnika Serbskeho gymnazija Budyšin (SGB) pódla. W minjenych tydźenjach so na tutón wjeršk intensiwnje přihotowachu a sej tež dobyće jedneje medalje kruće předewzachu. Zo je na kóncu njedźakowne štwórte městno wuskoćiło, njeje hańba, ale z rezultatom njeběchu spokojom. Sportowa konkurenca z Radeberga, Žitawy a Rychbacha bě sylna a hrajny niwow jara wurunany. W tabulce je widźeć, zo je mjez prěnim a poslednim jenož dypkaj rozdźěla, štož je ekstremnje mało. Zazběh do turněra je so hólcam wokoło kapitana Mateja Cyža wulkotnje poradźił, dobywši prěni přechod přećiwo Humboldtowym gymnaziju Radeberg wysoko z 25:10.

WK II RSA-Finale.JPG

.

Při tajkim jasnym rezultaće hrozy husto strach, přećiwnika podhódnoćić. A jako steješe w druhej sadźbje 23:23, běchu sylne čuwy žadane. To so Radebergskim hólcam lěpje poradźi, docpěłši přichodnej dypkaj. W třećim rozsudnym přechodźe dominowachu zaso serbscy šulerjo k njewohroženym 15:8. Přěhrata druha sadźba je na kóncu nažel bronzu płaćiła. Ale hišće lěpše zaměstnjenje bě móžne.W přichodnej partiji přećiwo domjacemu cyłkej, pokazachu naši hólcy najlěpši hrajerski wukon tutoho dnja. Najprjedy dobychu prěnju sadźbu z 25:20 a druhu dołho nawjedowachu. Tola krótko do kónca zaso wurunanje k 23:23. Móličkej dypkaj falowaštej volleyballistam SGB za slěbro. Sportowa hala so warješe, wšako spózna sylny fanowy blok swojich Rychbarskich hólcow šansu na dobyće. A woni so po mjeńšinje tež radowachu. Znowa bě třeća sadźba trěbna, kotraž bě dołho wurunana. Škoda, zo falowaše SGB w tym abo tamnym wokomiku trěbne zbožo. Z 12:15 wotedachu tutón přechod a běchu w prěnim wokomiku tež přesłapjeni, wšako chcychu wažnu partiju za sebje rozsudźić. Jako so předposledna hra turněra z njewočokanym wuslědkom skónči, Radeberg dobudźe přećiwo Rychbachej z 2:1, poskića so naraz Budyskim hrajerjam šansa na złoto. Kajki to kuriozny wotběh turněra, hdyž kóžde mustwo dobudźe a naraz přěhraje. Za prěnje městno dyrbja pak volleyballistow Christiana Weisu gymnazija ze Žitawy wysoko z 2:0 porazyć. Na kóncu wobeju přechodaj bě spóznać, zo cyle jednorje mocy a z tym spěšnosć w pólnym škiće falowachu, štož je po šěsć sadźbow napinaceho wojowanja tež zrozumliwe.

Tak rozsudźichu Žitawscy sportowcy tutón duel z 25:22 a 25:20 za sebje.

Po mytowanju dobyćerjow sćěhowaše hišće rjany podawk z hwida Serbskeho gymnazija. Jich kapitan Matej Cyž z Chrósćic je so wot sudnikow a mustwowych nawodow tamnych šulow jako najlěpši hrajer wuchodosakskeho finala wuznamjenił. Wutrobna gratulacija. Njech je tutón wuspěch za Mateja a za swojich sobušulerjow motiwacija so dale w tutej rjanej bulosportowej družinje wukmanić.

 

Kónčna tabulka regionalneho finala we volleyballu starobneje skupiny II

 

dypki sadźby
Wyša šula Rychbach  4 5:3
Christian-Weise gymnazij Žitawa    4 4:3
Humboldtowy gymnazij Radeberg  2 4:5
Serbskij gymnazij Budyšin     2 3:5