Rjany wuspěch we wuchodosakskim finalu

Šulerki-volleyballistki 11. a 12. lětnika Serbskeho gymnazija Budyšin (SGB) dojědźechu sej minjenu srjedu do Wojerec na regionalne finale wubědźowanja “Młodźina trenuje za olympiju”. Minjene lěto wróćichu so z bronzowej medalju, tónraz wuskoći samo slěbro. Wot šryrjoch cyłkow běchu tři přitomne, dokelž njebě wokrjesny dobyćer Zhorjelc-Žitawa dojěł. Tak rozsudźi zamołwity turněra hrać tři dobyćerske sadźby. Wulosowanje chcyše, zo nastupichu šulerki SGB w prěnjej hrě nyhdom přećiwo wysokemu faworitej, Ewangelskej swobodnej šule Ochranow. Zinzendorfscy gymnazijastki trenuja wjackróć wob tydźen w tamnišim zjednoćenstwje a wobdźěla so prawidłownje na dypkowych hrach na wobwodnej runinje. Naše holcy so mócnje wobarachu, njemějachu pak žanu šansu na dobyće. Techniska přewaha sportoweho kontrahenta bě při sylnych nadaćach a mócnych nadběhach wočiwidna.

VB-RSA Finale Wk I Mä. 2.Platz 2015.JPG
K foće: Volleyballowe mustwo holcow 11. a 12. lětnika Serbskeho gymnazija Budyšin wubědźi sej minjenu wutoru we Wojerecach na wuchodosakskim regionalnym finalu w starobnej klasy sk I slěbro.
 Wotlěwa su to: Sofija Cyžec, Rejzka Mejgelec, Lydija Rachelic, Nadine Čižankec, Pia Šołćic;
 Klečo wotlěwa: Nadja Zamora a Madlena Bartec.
.

 Woni přesadźichu so we wšitkich třoch sadźbach, a to jasnje z 25:10, 25:12 a 25:10. Za psychu šulerkow SGB njebě to runje optimalny start. Ale w přestawce sej předewzachu, druhu partiju lěpje započeć a wo kóždy dypk wojować. A hlej, pozbudźowanje je so wudaniło. Přećiwo Powołanskej šuli Kamjenc hrajachu naše holcy z lóštom a elanom. Nětko poradźichu so tež rjane akcije při saku a w pólnym škiće. Tak rozsudźichu šulerki wokoło kapitanki Nadine Čižankec jednotliwe sadźby z 25:20, 25:18 a 25:19 za sebje. Na dobyće slěborneje medalje móža wone horde być, wšako su prěni cyłk Serbskeho gymnazija Budyšin w starobnej klasy I (11.-13. lětnik), kotryž je w minjenych dwaceći lětach tónle rjany wuspěch docpěł. A hač so našim najmjeńšim volleyballistam 6. a 7. lětnika podobne rezultaty poradźa, čitajće přichodny tydźen w SN.