Volleyballiski Serbskeho gymnazija znowa w sakskim finalu

Srjedu, 14.01.2015, krótko po 14.00 hodź, bě wjeselo pola volleyballistkow 7. a 8. lětnika Serbskeho gymnazija Budyšin (SGB) njesměrnje wulke. Wšako běchu w swójskej sportowej hali znowa kwalifikaciju za sakske final docpěli. Zradowane skakachu w kruhu a wołachu wótře „ Finale, finale, hej,hej,hej“. Sobušulerjo wjeselachu so z nimi, kleskachu euforisce a dźiwachu so, kak wuběrnje zamóža holcy z bulom wobchadźeć. Šulerki SGB pojědu nětko k druhemu razej na krajne finale, kotrež budźe 19. měrca w Dippoldiswaldźe. A hišće dalši rjany podawk sćěhowaše po mytowanju dobyćerjow. Luiza Šubertec z Kamjenca wuznamjeni so, kaž hižo před tydźenjom Matej Cyž z Chrósćic, jako najlěpša hrajerka wuchodosakskeho volleyballoweho finala w Budyšinje. Wutrobnu gratulaciju

VB-SGB WkIII Mä1.Pl RSA-Finale 2015.JPG

K foće: We wuchodosakskim finalu volleyballa wubědźichu sej holcy 7. a 8. lětnika Serbskeho gymnazija Budyšin złotu medalju. Woni pojědu nětko 19. měrca na sakske finale do Dippoldiswaldy. Stejo wotlěwa: Lea Krječmarjec, Tadeja Šeferec, Helena Hejduškec, Wibke Zickmüller, Luise Garbe, Luiza Šubertec (najlěpša hrajerka turněra) a Sophie Hejduškec.

.

 

SGB – Gymnazij Horni kraj Wodowe Hendrichecy 2:0

Z mócnym zapalom startowachu šulerki serbskeho kublanišća do turněra a přez stacije 7:1, 15:1 a 25:7 zdeklasowachu wone sportoweho kontrahenta z Wodowych Hendrichec. Holcy tamnišeho gymnazija běchu našim technisce a atletisce słabše. W druhej sadźbje zasadźichu so sobuhrajerki a tež woni zmištrowachu nadawki wuběrnje, přesadźiwši so z 25:14. W tutej starobnej klasy hraja stajnje štyrjo přećiwo štyrjom a to na mjeńšim hrajnišću.

SGB – Wyša šula Niska 2:1

Sćěhowaše njesměrnje napjata partija wo złotu medalju. Jenož moličkej dypkaj rozsudźištej w prěnjomaj sadźbomaj wo dobyće a přěhraće. W prěnim přechodźe poskića so holcam z Niesky při stawje 25:24 sadźbowy bul, ale hrajerki wokoło wusahowacej Luizy Šubertec wobchowachu měr a sadźbu hišće z 27:25 za sebje rozsudźichu. Tež druhi přechod bě hač do kónca wurunany. Šulerki srjedźneje šule so w pólnym škiće njesměrnje stopnjowachu a sej tak snadne 25:23 zawěšćichu. Třeća sadźba bě trěbna a wobej mustwje so hišće raz motiwowaštej. Štož pak w přichodnych wosom mjeńšinach sćěhowaše, je wulkeje chwalby hódne. Z kajkej sebjedowěru serbske holcy wustopowachu, kak z nadaćemi a z nadběhom ćišć wukonjachu, bě sensacionelne. Z 15:6 ! njepřewostajichu Nišćanskim šulerkam žanu šansu. Radosć a wjeselo to na jednej stronje, resignacija a zatrašenje na tamnej.

SGB – Gymnazij F. Sauerbrucha Großröhrsdorf 2:0

Bě to jednostronska partija, dokelž běchu naši holcy na wšěch polach lěpše. Přežadane volleyballistki z Großröhrsdorfa wotedachu wobaj přechodaj wysoko z 25:9 a 25:11.

Končna tabulka regionalneho volleyballoweho finala starobneje skupiny III

 

dypki

sadźby

Serbski gymnazij Budyšin

6

6:1

Wyša šula Niesky

4

5:3

Gymnazij Wodowe   Hendrichecy

2

3:4

Gymnazij Großröhrsdorf

0

0:6