Koparki Serbskeho gymnazija 10. raz w sakskim finalu

Złoto za serbske holcy w Großröhrsdorfje

Hižo k 10. razej je so jedne holče koparske mustwo Serbskeho gymnazija Budyšin (SGB) za krajne kónčne koło kwalifikowało. Před lětomaj su sej aktualni dobyćerjo (hlej foto) sensacionelnje slěbornu medalju w starobnej klasy IV wubědźili (SN wotym rozprawjachu). Bě to dotal najwjetši wuspěch šulerkow serbskeho kubłanišća na tutej runinje. A nětko kiwa znowa sakske finale, kotrež wotměła so 16. junija w Freitalu. Minjeny tydźen dojědźe sej šěsć holčich cyłkow z wuchodneje Sakskeje do Großröhrsdorfa, zo bychu we wobłuku šulskeho sportoweho wubědźowanja “Młodźiona trenuje za olympiju” regionalneho mištra w starobnej klasy III (7. a 8. lětnik) zwěsćili.

FB-SGB holcy WkIII.JPG

K foće: We wobłuku šulskeho sportoweho wubědźowanja “Młodźina trenuje za olympiju” dobychu koparki Serbskeho gymnazija regionalne finale w Großröhrsdorfje a pojědu nětko 16. junija na kónčne krajne wurisanje do Freitala. Wotlěwa su to: Karoline Šrajterec, Judit Pjetašec, Helena Šołćic, kapitanka Lea Krječmarjec, Nadja Brězanec, Tadeja Šeferec, Helena Hejduškec, Friederike Lehmannec a prědku wrotarka Nele Pjetašec.

.

Tak hraješe kóždy přećiwo kóždemu 12 mjeńšin, a to paralelnje na dwejoch hrajnišćach. Prěni sportowy kontrahent SGB bě Gymnazij Ferdinanda Sauerbrucha Größröhrsdorf. Před lětom dźělištej so mustwje njerozsudnje, tola nětko dominowachu serbske holcy a po pjeć mjeńšinach zapisa sej sudnik prěnje wrota. Tadeja Šeferec z Horow přiwza na prawej stronje přirawku kapitanki Leje Krječmarjec z Wulkeho Wjelkowa, wuhra přećiwnisku škitarku a suny bul nimo wrotarki do syće. Wažne 1:0 bě tež kónčny rezultat. Sćěhowaše partija přećiwo Wyšej šuli Mikow. Techniska a atletiska přewaha našich koparkow mytowa so přez šěsć rjanych wrotow. Znowa bě Tadeja Šeferec z třomi wuspěšna. Tamne wrota docpěchu Karoline Šrajterec z Budyšina, Helena Šołćic z ....... a hižo mjenowana Lea Krječmarjec. Na pódlanskim hrajnišću přesadźi so dwójce Friedrich Schillerowy gymnazij Budyšin a tak bě direktny duel wažny za wukónc turněra. Serbske šulerki so njesměrnje motiwowachu a startowachu kaž wohnjowa wobora. W druhej mjeńšinje trjechi Helena Šołćic lěwu žerdź, w štwórtej mjeńšinje smóknje Lea Krječmarje z 20 metrow bul na prawu žerdź a krótko po tym měješe Helena Hejduškec z Horow wulkošansu za nawjedowanje, ale jeje třělwa misnje snadnje wrota. A jako poskića so najlěpšej hrajerce Schillerowcow nawjedowanje, bě wrotarka Nele Pjetašec z Pančic-Kukowa z wulkotnej paradu na městnje. Suwerenje je wona tež w dalšich dwubojach klětku čistu dźeržała. Tak skónči so hra bjez wrotow njerozsudnje. Po krótkej přestawce sćěhowaše štwórta hra a to přećiwo koparkam Wyšeje šule Bukecy. Bě to jednostonske rozestajenje, hdžež padachu wrota kaž zrawe wišnje ze štoma. Kónčny rezultat ze 6:0 by hišće wyše wupadnył, jeli bychu serbske holcy wjacore wulkošansy rezolutnišo wužili. Do lisćiny třělcow wrotow zapisachu so dwójce Tadeja Šeferec a Lea Krječmarjec kaž tež Helena Hejduškec a Helena Šołćic. Dokelž hrajachu Schillerowcy paralelnje přećiwo Großröhrsdofej njerozsudnje, by našim w poslednej hrě tež njerozsudny rezultat za docpěće krajneho finala dosahało.

Koparki SGB chcychu pak dobyće, a tak so wot prěnjeje mjeńšiny tež prezentowachu. Přez wroće Heleny Hejduškec a Tadeje Šeferec přećiwo Goethowym gymnaziju Biskopic skulojćichu šulerki serbskeho kubłanišća wurjadny rezultat tutoho wurisanja. Bohožel so mjeńšinu do wothwizdanja najlěpša hrajerka turněra zrani. Kapitance Leje Krječmarjec so w lěwym bristwje musklowa nitka torny, tak zo nětko někotre tydźenje wupadnje. Přejemy wurjadnej sportowće spěšnje wustrowjenje a wšitkim tamnym koparkam wjele wuspěcha w krajnym finalu.

Naspomnić ma so hišće rezultat młódšeje starobneje klasy IV pola hólcow. We wokrjesnym wurisanju docpěchu šulerjo 5. a 6. lětnika mjez wosom startowacym šulam finale, kotrež pak z 0:2 přećiwo Schillerowym gymnaziju přěhrachu. Ale tež našim najmjeńšim koparam słuša wulke připóznaće.