Tereza Pöpelec z Chrósćic šulski rekord polěpšiła

Serbski gymnazij lochkoatletiski třibój na Młynkec łuce wotměł

Při suchim a zdźěla słónčnym wjedrje wotmě so minjenu wutoru tradicionelne wubědźowanje Serbskeho gymnazija Budyšin w lochkoatletice na Młynkec łuce. Šulerjo zwěsćichu swojich najlěpšich sportowcow w běhanju, dalokoskakanju, mjetanju bulika a storkanju kule. Najprjedy wojowachu holcy a hólcy 5. do 8. lětnika wo najlěpše rezultaty. Fridjof Schade z rjadownje 8-2 docpě z 308 dypkami najlěpši wukon dopołdnja a třeći najlěpši cyłeje šule. Slědowaše sobušulerka Lea Krječmarjec, wurjadna koparka a volleyballistka, z 252 dypkami. A aktiwna běharka na srjedźne a dlěše distancy Larissa Měrćinkec z rjadownje 7-1 bě z 234 dypkami třeća najwuspěšniša našich młódšich sportowcow. Prjedy hač podachu so lětniki 5 do 8 domoj, wotmě so hišće woblubowany staflowy běh (stajnje 4 hólcy a 4 holcy z jedneje rjadownje) na 400 metrow. Wo wosebity wjeršk postara so talentowana lochkoatletka Tereza Pöpelec z Chrósćic. Wona polěpši w lochkoatletiskim třiboju wosobinski rekord, kotryž je zdobom šulski, na sensacionelne 445 dypkow. Wurjadna sportowca zmištrowa běh na 75 metrow w 9,9 sekundach, wona skoči 4,61 metrow daloko a storči kulu na 9,85 metrow. Tak docpě šulerka z rjadownje 9-1 w sumje třoch disciplinow grandiozne 455 dypkow, 29 wjac hač w juniju 2015 na samsnym městnje.

SGB-LA2015.JPG

K foće: Tereza Pöpelec z Chrósćic (srjedźa) je w lochkoatletiskim třiboju z 455 dypkami sensacionelny nowy rekord na Budyskim Serbskim gymnaziju nastajiła. Druha najlěpša bě Terezija Rawšec z Łazka z 318 dypkami (naprawo), třeće městno wubědźi sej Budyšan Fridtjof Schade z 308 dypkami (nalěwo).

.

A hišće dalši sensacionelny wuspěch je so Terezy Pöpelec na kóncu minjeneho šulskeho lěta poradźił. Při sakskich mišterstwach w Lipsku polěpši 26lětny rekord serbskeho kubłanišća na 100 metrow wo nyhdom sydomdźesaćinow na aktualne 13,2 sekundow. Wutrobnu gratulaciju na tutym městnje. Mjez našimi “wjetšimi” šulerjemi bě Terezija Rawšec z 10-1 z 318 dypkami druha najlěpša tutoho dnja. A sobušulerka Kira Hrjehorjec zmištrowa z 282 dypkami třeći najlěpši wukon připołdnišich wubědźowanjow. Přez 25 šulerkow a šulerjow docpě wjace hač 200 dypkow, štož wotpowěduje w šulskim sporće “wurjadnej jedynce”. Z rukow šulskeho nawody Renèja Wjacławka mytowachu so najlěpši třo lochkoatleća kóždeho lětnika z wopismom a medalju.

Najlěpši lochkoatleća Serbskeho gymnazija Budyšin:

1.

Tereza Pöpelec

9-1

445 dypkow

2.

Terezija Rawšec

10-1

318 dypkow

3.

Fridjof Schade

8-2

308 dypkow

4.

Kira Hrjehorjec

10-1

282 dypkow

5.

Clara Heller

10-2

274 dypkow

6.

Maria-Helena Bretšnajderec

9-4

269 dypkow

7.

Emily Schulze

9-3

263 dypkow

8.

Anna Richter

10-2

258 dypkow

9.

Lea Krječmarjec

8-2

252 dypkow

10.

Larissa Měrćinkec

7-1

234 dypkow