Volleyballisća SGB najlěpši we wuchodnej Sakskej

Mjez 16 startowacymi šulemi z wuchodneje Sakskeje, a to w štyrjoch starobnych skupinach, zaruči sej Serbski gymnazij Budyšin (SGB) we volleyballu wurjadne prěnje městno. Najmłódši hrajerjo wróćichu so z Kamjenca ze slěbornej a bronzowej medalju.

Kajki to zwjeselacy wukónc regionalneho wubědźowanja we volleyballu pod hesłom “Młodźina trenuje za olympiju”. Serbskij gymnazij wudoby sej po lěće 2014 znowa čestne wopismo najlěpšeje šule wuchodneje Sakskeje w tutej bulosportowej družinje. Z dwěmaj złotymaj, dwěmaj slěbornymaj a jednej bronzowej medalju wobsadźi SGB ze 16 dypkami suwerenje prěnje městno (hlej přehlad). Wutrobnu gratulaciju wšitkim holcam a hólcam serbskeho kubłanišća za grandiozny wuspěch. K jara zwjeselacej cyłkownej bilancy přinošowachu minjeny štwórtk naši najmłódši volleyballisća. W sportowej hali Lessingoweho gymnazija Kamjenc, hdźež běchu wosom šulerskich cyłkow z wuchodneje Sakskeje pódla, wubědźichu sej holy 5. do 7. lětnika slěbro, hólcy samsneje staroby bronzu. W turněrowej formje hraješe kóždy přećiwo kóždemu dwě dobyćerskej sadźbje. Šulerki SGB startowachu wurisanje přećiwo pozdźišemu dobyćerjej starobneje skupiny IV, Joliot-Curie gymnazijej Zhorjelc, z 25:23 dobyćom. W druhim a třećim rozsudnym přechodźe pak snadnje podležachu. Wjace zboža kiwaše našim holcam w dalšimaj partijomaj. Najprjedy přesadźichu so přećiwo Lessingowym gymnazijej Kamjenc dwójce z 25:23 a tež přećiwo Wyšej šuli Žitawa rozsudźichu teabreak ze 17:15, po tym, zo skónči so prěnja sadźba 25:15 a druha 19:25. Wulki podźěl na rjanym wuspěchu měješe najmłódša volleyballistka SGB, šulerka 5. lětnika Linna Kern z Delneje Hórki. Aktiwna hrajerka Budyskeho MSV 04 měješe při mytowanju najlěpšeje hrajerki móhlički dypk mjenje hač Hanna Jung ze Zhorjelca. Pola hólcow přesadźi so wysoki faworit ze Žitawy. Volleyballisća Christiana Weisoweho gymnazija dobychu wšitke tři partije z 2:0 a pojědu kaž hižo w minjenym lěće na krajne kónčne wurisanje. Škoda, zo přěhrachu serbscy hólcy sportowy duel wo slěbro přećiwo Wyšej šuli Běła Woda z 20:25 a 14:25. Měrny a solidny natwar falowaše jim za dalše wuspěšne akcije. Přećiwo technisce słabšim hrajerjam z Kamjenca so po wulkim boju z 25:21 a 26:24 přesadźichu. Woni njetrjebaja zrudni być, wšako přinošowachu k jara zwjeselacej cyłkownej bilancy Serbskeho gymnazija Budyšin.

Najlěpše šule wuchodneje Sakskeje we volleyballu lětsa su:

1.

Serbskij gymnazij Budyšin

16 dypkow

2.

Christiana Weisowy gymnazij Žitawa

9 dypkow

3.

Friedrich Schleiermachowy gymnazij Niska, Humboldtowy gymnazij Radeberg

8 dypkow

4.

Goethowy gymnazij Biskopicy, Lessingowy gymnazij Kamjenc

6 dypkow

VB-SGB reg.finale Wk IV 2016.JPG

K foće: W regionalnym volleyballowym finalu wubědźichu sej holcy 5. do 7. lětnika Serbskeho gymnazija Budyšin slěbornu medalju a hólcy samsneje staroby bronzowu. Zady wotlěwa su to Ławrjenc Bobka, Matthias Pilz, Wito Pohonč, Julian Tomašk, Jakub Bobka; prědku wotlěwa Anja Baumgärtelec, Larissa Měrčinkec, Linna Kern, Milena Kummer a Lavinia Bührdelec. Sportowemu wučerjej Měrkej Korjeńkej přepoda so čestne wopismo najlěpšeje šule wuchodneje Sakskeje w tutej bulosportowej družinje.