Sensacionelny wuspěch volleyballistkow SGB

W krajnym finalu wubědźowanja „Młodźina trenuje za olympiju“ wudobychu sej holcy 8. a 9. lětnika w starobnej skupinje III mjez šěsć startowacymi mustwami slěbro. W kónčnej partiji podležachu po wulkim boju gymnaziastkam z Lichtensteina z 0:2. Woni su nětko třeće mustwo Serbskeho gymnazija Budyšin (SGB), kotrež wróći so do Łužicy z titulom sakskeho wicemištra šulow našeho kraja.

SGB-VB Sa-Finale Wk III.JPG

K foće: W sakskim finalu we volleyballu wubědźichu sej holcy 8. a 9. lětnika Serbskeho gymnazija Budyšin w Dippoldiswaldźe slěbornu medalju. Zady wotlěwa kapitanka Luiza Šubertec, sportowy wučer Měrko Korjeńk, Lea Krječmarjec; prědku wotlěwa Wibke Zickmüller, Tadeja Šeferec a Helena Hejduškec.

 

Kajki to grandiozny wuspěch volleyballistkow SGB minjeny štwórtk w Dippoldiswaldźe. Po dobyću bronzy w aprylu 2014 docpěchu hrajerki wokoło kapitanki Luizy Šubertec nětko finale kónčneho krajneho wurisanja. Sydom holcow su wot spočatka šulskeho lěta na pjatkownišej AG na tutón wjeršk přihotowali. A rezultat je pokazał, zo je so kóžda přidatna kapka potu na treningowych jednotkach wudaniła. Započało bě so krajne finale z hrami předkoła.  Zazběh do turněra je so holcam z Budyšina derje poradźił. Wone njedachu gymnaziastkam z Lipska žanu šansu na dobyće a přesadźichu so we woběmaj sadźbomaj z 25:21 a 25:14. Technisce jara dobre hrajerki z wulkoměsta při Plesy běchu našim atletisce słabši. Sćěhowaše rozsudna partija wo prěnje městno w stafli 2. Sportowy kontrahent z Lichensteina, města blisko Šwikawy, započa duel při saku z mócnym zapalom. Serbske holcy so njepodachu a srjedź sadźby wurunachu. Dźakowano sylnym čuwam rozsudźichu prěni přechod hišće z 25:22 za sebje. Podobny tež wotběh druheje sadźby. A jako Lichtensteinscy hrajerki z 23:21 nawjedowachu, ličeše kóždy hižo z třećej sadźbu. Ale přichodnej nadběhaj prasnychu woni zwonka našeho pola. Napjata to faza, w kotrjež bijachu wutroby hrajerkow dwójce tak spěšnje kaž hewak. Po dwěmaj mjeńšinomaj radowachu znowa serbske holcy při dramatiskim wukóncom z 25.23. Jako staflowy dobyćer hrajachu w połfinalu přećiwo druhemu stafle 1, Wernera Heisenbergoweho gymnazija Riesa. Sportoweho kontrahenta derje znajachu, wšako přěhrachu před lětomaj partiju wo slěbro z 0:2. Tak běchu dwójce motiwowani, sprěnja so za poražku rewanžować a zdruha so za finale kwalifikować. Sćěhowaše dalša partija, w kotrejž so čuwy mócnje štrapacěrowachu.  Najprjedy doby kóžde mustwo jednu sadźbu z 25:22. Rozsudny přechod bě trěbny, w kotrymž Riesascy 10:9 nawjedowachu. Štož pak potom Luiza Šubertec, Helena Hejduškec, Tadeja Šeferec, Lea Krječmarjec a Wibke Zickmüller zdokonjachu, wužada sej wysoku chwalbu. Z bojom wo kóždy centimeter hrajnišća sej dypk po dypku nahromadźichu a sadźbu hišće z 15:11 a z tym hru z 2:1 dobychu. W tutym wokomiku bě wjeselo njesměrnje wulke, wšako docpěchu finale. Na pódlanskim polu přesadźichu so suwerenje holcy z Lichensteina z 2:0 přećiwo gymnaziastkam z Brand-Erbisdorfa, tak zo přindźe znowa k duelej Budyšin-Lichtenstein. Při volleyballowych turněrach dawa jedne přisłowo: „Dobudźeš zrědka dwójce přećiwo samsnemu mustwu.“ Tak bě tež w Dippoldiswaldźe. Gymnaziastki z Lichtensteina rozsudźichu finale z 25:18 a 25:19 za sebje. Naše šulerki njetrjebaja zrudni być, wšako docpěchu jako prěni voleyballowy cyłk SGB kóčnu hru na krajnej runinje.

Kónčne zaměstnjenje sakskeho finala holcow we volleyballu

1. Prof. Dr. M. Schneider gymnazij Lichtenstein

2. Serbskij gymnazij Budyšin

3. Gymnazij B.-von-Cotta Brand-Erbisdorf

4. Werner Heisenbergowy gymnazij Riesa

5. Gymnazij Thomasowa šula Lipsk

6. Gymnazij Drježdźany-Cotta