Volleyballisća SGB w sakskim finalu bronzu snadnje misnyli

W krajnym finalu we volleyballu starobneje klasy II wurisanja “Młodźina trenuje za olympiju” w Dippoldiswaldźe falowaštej našim hólcam móličkej dypkaj za bronzu. Rozsudnu třeću sadźbu přěhrachu hrajerjo wokoło kapitana Mateja Cyža přećiwo  Wernera Heisenbergowym gymnaziju Riesa njedźakownje z 13:15 a skónčichu tak turněr na 4. městnje.

SGB-VB Sa.-Finale Wk II.JPG

K foće: W sakskim volleyballowym finalu wobsadźichu hólcy Serbskeho gymnazija Budyšin w starobnej skupinje II we wurisanju “Młodźina trenuje za olympiju” w Dippoldiswaldźe 4. městno. Wotlěwa su to Józef Hantuš, Janek Süß, Tadej Handrik, kapitan Matej Cyž, předku wotlěwa Gabriel Zahrodnik, Toni Rudolph, Maksimilian Jurack ze sportowym wučerjom Měrkom Korjeńkom. 

 

Po dobyćomaj bronzoweje medalje w lětomaj 2012 a 2014 w krajnym finalu předewzachu sej volleyballisća 10. a 11. lětnika Serbskeho gymnazija Budyšin (SGB) znowa wo tute městno wojować. Intensiwnje so na pjatkownišich AG-hodźinach přihotowachu a so přidatnje přećiwo mužacym cyłkam Budyskeje FSG a JTV Koblicy wukmanichu. Škoda, zo falowaše jim w Dippoldiswaldźe w rozsudnej třećej sadźbje přećiwo Werner Heisenbergowym gymnaziju Riesa trěbne zbožo. Ze sylnym bojom nachwatachu 10:14 zastatk na 13:14. Napjatosć je w tajkim wokomiku njesměrnje wulka a tak je zrozumliwje, zo so zmylki stanu. Přichodne nadaće našich hólcow padnje bohužel do saka a z tym zhubi so són wo bronzu. Přesłapjeni wopušćichu hrajnišćo, štož je normalnje. Cyłkownje widźane pokazachu talentowani šulerjo přeswědčacy wukon, wšako njeje žadyn z nich aktiwny volleyballist jednoho zjednoćenstwa. Do tuteje sadźby přesadźichu so najprjedy naši z 26:24, druhi přechod pak z 22:25 wotedachu. Turněr w Dippoldiswaldźe započa z hrami předkoła. Naš prěni sportowy kontrahent bě Goethe gymnazij Rychbach z Vogtlanda, kotryž wobsadźi na kóncu druhe městno. Wón hraješe technisce jara wěšće a přesadźi so we woběbaj sadźbomaj z 25:14 a 25:17. Sćěhowaše wažna partija wo docpěće połfinala.  Volleyballisća Herderoweho gymnazija Schneeberg južnje Šwikawy spytachu wosebje přez sylne nadaća dypkować, štož so jim jenož zdźěla poradźi. Z pomocu mócnymi smješami a wuspěšnymi blokami dobychu hólcy SGB wobaj přechodaj z 25:19 a 25:22. Z tym kwalifikowachu so za mjezykoło, hdźež čakaše na nich Sportowy gymnazij Lipsk. Jich hrajny niwow móže so přirunować z mužacym cyłkom wobwodneje ligi. Kompliment našim hólcam, kotrež docpěchu z 19 dypkami we woběmaj sadźbomaj najlěpši rezultat wšitkich startowacych cyłkow tutoho dnja. Po krótkej přestawce přizamknje so rozestajenje wo třeće městno, kotrež je so na spočatku přinoška hižo rozjasniło. Hrajerjo wokoło kapitana Mateja Cyža njetrjebaja zrudni być, wšako docpěchu w minjenych štyri lět mjez šěsć najlěpšimi šulemi našeho kraja dwójce bronzu a nětko 4. městno. A za to wšitkim wutrobnu gratulaciju.

Kónčny staw krajneho finala we volleyballu starobneje klasy II pola hólcow

1. Sportowy gymnazij Lipsk

2. Goethe gymnazij Rychbach/Vogtland

3. W.-Heisenberg gymnazij Riesa

4. Serbski gymnazij Budyšin

5. J.-G.-Herder gymnazij Schneeberg

6. Wyša šula Bad Düben