Wysoke počesćenje Serbskemu gymnazijej Budyšin

W cyłkownym hódnoćenju rezultatow volleyballowych wubědźowanjow we wurisanju “Młodźina trenuje za olympiju” we wuchodnych a sakskich finalach wubědźi sej Serbski gymnazij Budyšin (SGB) w starobnych skupinach II, III a IV (5. do 11. lětnik) wuběrne 1. městno. Tak wuznamjeni so serbske kubłanišćo prěni raz jako najwuspěšniša šula Sakskeje w tutej bulosportowej družinje.

Hdyž přistupištaj minjeny pjatk popołdnju wiceprezident Sakskeho volleyballoweho zwjazka Dietrich Hafenberg a šulski nawoda SGB Rene Wjacławk sportowu halu, so holcy a hólcy na beachvolleyballowe wubědźowanja přihotowachu. Nichtó z nich njezamó sej předstajić, kajke wysoke počesćenje w přichodnych pjeć mjeńšinach na nich čakaše. Regionalny zamołwity za šulski volleyballowy sport Dietrich Hafenberg kwaleše rezultaty serbskich gymnazijastow w tutym šulskim lěće, přeješe jim dalše wurjadne rezultaty a přepoda sportowemu wučerjej Měrkej Korjeńkej pućowanski pokal najwuspěšnišeje šule Sakskeje we volleyballu sezony 2015/16. Nimo pokala dósta SGB hišće jedyn złoćany bul a wopismo šulskeho zamołwiteho za volleyballowy sport w Sakskej Karl-Heinz Rutkeho z Markranstädta. Wšitkim šulerkam a šulerjam wulke připóznaće, kotrež su z jich angažementom k tutemu wuspěchej přinošowali. Wysoke počesćenje je dopokaz kontinuaceho wuspěšneho dźěła we volleyballu na serbskim kubłanišću. Sportowe gymnazije su so z tuteho hódnoćenja wuzamknjeli.

Najwuspěšniše šule Sakskeje we wubědźowanju “Młodźina trenuje za olympiju” we volleyballu starobnych skupin II, III a IV w šulskim lěće 2015/16

1.

Serbski gymnazij Budyšin

19 dypkow

2.

Gymnazij Bürgerwiese Drježdźan

18 dypkow

3.

Goethe gymnazij Rychbach/ Vogtland

Bernhard-von-Cotta gymnazij Brand-Erbisdorf

17 dypkow

5.

Prof.-Dr.-Max Schneider gymnazij Lichtenstein

16 dypkow

6.

Werner-Heisenberg gymnazij Riesa

15 dypkow