Suwerene dobyće koparkow SGB

We wobłuku šulskeho sportoweho wubědźowanja “Młodźina trenuje za olympiju” zwěšćichu minjeny tydźen štyri holčich cyłkow swojeho regionalneho mištra. Šulerki Serbskeho gymnazija Budyšin (SGB) dobychu wšitke tři partije a pojědu w juniju 2017 na Sakske finale do Freitala.

Najwuspěšniše holče koparske mustwo Budyskeho Serbskeho gymnazija skwalifikowa so štwórty raz za krajne finale , a to w minjenych pjećoch lětach. W juniju 2013 poradźi so jim z dobyćom slěborneje medalje dotal najlěpši rezultat. A minjenu srjedu njedachu sportoweje konkurency z wuchodneje Sakskeje w Humboldtowym haju w Budyšinje ani jeničku šansu na dobyće.

SGB-FB 2016 RF-Mä.JPG

K foće: Koparki SGB dobychu regionalne finale w Budyskim Humboldtowym haju a pojědu w juniju 2017 na kónčne krajne wurisanje do Freitala. Stejo wotlěwa su to: Helena Šołćic, Tadeja Šeferec, Helena Hejduškec, kapitanka Lea Krječmarjec, Tereza Wićazec (referendarka za sport a serbšćinu na SGB); prědku wotlěwa: Karoline Šrajterec, Lavinia Bührdel, Weronika Krawcec a wrotarka Nele Pjetašec.

SGB – Wyša šula Mikow 2:0

Koncentrowani startowachu holcy SGB tutu partiju a sej někotre šansy wuhrachu. Po wosom mjeńšinach we wrotach Wyšeje šule Mikow zaklinka. Mócna třělwa Heleny Hejduškec z Horow skoči wot nohi škitarki njedźeržomnje do praweho delnjeho róžka. To bě połčasny rezultat. A jako po dwanaće a poł mjeńšinach so stronje změništej, njetraješe dołho zwyši kapitanka Lea Krječmarjec z Wulkeho Wjekowa na 2:0. Wurjadna hrajerka spózna njedorozumjenje Mikowskich holcow w srjedźnym polu, startowa solo a smóknje bul z něhdźe 15 metrow do hornjeho lěweho róžka.

SGB – Schillerowy gymnazij Budyšin 3:0

Hnydom w prěnim połčasu padnychu wšitke tři wrota. Najprjedy bě to Helena Šołčic z Róžanta, kotraž přihrawku Heleny Hejduškec direktnje přetwori. Dwě mjeńšinje pozdźišo postara soTadeja Šeferec z Horow wo druhe wrota, dokelž bě z bulom spěšniša, hač jeje škitarka. A krótko do přestawki zwyši  Lea Krječmarjec z přemyslenej akciju na kóčne 3:0. Wrotarka SGB Nele Pjetašec z Pančic-Kukowa bě bjezdźěłna, wšako so Schillerowcy jenož na škitanje koncentrowachu.

SGB – Goethe gymnazij Biskopicy 3:0

Před lětom hišće brizantna finalna partija, lětsa dominanca serbskich hrajerkow wot spočatka hač ke kóncej. W prěnim połčasu so gymnazijastki z Biskopic mócnje wobarachu, ale w druhim wotrězku falowaše trěbna  kondicija a z tym techniska wěstosć. Tak zešlachći so Heleny Hejduškec dwójne a Tadeje Šeferec jedne wrota. Škit serbskich koparkow z Weroniku Krawcec z Pančic-Kukowa a Karolinu Šrajterec z Budyšina kaž tež hłownej organizatorku Leju Krječmarjec, dopomhachu wrotarce Nele Pjetašec po třoch dwubojach k čistej klětce.

Kóčna tabulka regionalneho finala w starobnej skupinje II:

1.       Serbskij Gymnazij Budyšin

9

8:0

2.       Goethe gymnazij Biskopicy

4

3:5

3.       Wyša šula Mikow

2

0:2

4.       Schillerowy gymnazij Budyšin

1

2:6