Sensacionelny wuspěch lochkoatletkow SGB

Tereza Pöpelec z nowym šulskim rekordom

Prěni raz w sportowych stawiznach Serbskeho gymnazija docpě jedne holče mustwo w lochkoatletice sakske finale. Kónc septembra wotmě so na Budyskej Młynkec łuce regionalne finale šěsć šulow w starobnej klasy II we wurisanju “Młodźina trenuje za olympiju”.

SGB-LA 2016 RF Wk II.JPG

K foće : Tući dźewjeć holcow pojědu prěni raz na sakske krajne finale w lochkoatletice a to w přichodnym lěće do Kamjenic. Stejo wotlěwa: Luiza Nowakec, Lea Krječmarjec, Maria-Helena Bretšnajderec, Tereza Pöpelec, Sophie Hejduškec, Helena Hejduškec, Tadeja Šeferec, Kira Hrjehorjec a Luisa Heinke (faluje na wobrazu)

A serbske holcy přesadźichu so z předskokom wot 131 dypkow přećiwo sylnej konkurency z Lubija a Wojerec. Wo wosebity wjeršk postara so Tereza Pöpelec z rjadownje 10-1 w běhu na 100 metrow. Wona polěpši swójski šulski rekord na aktualne 12,67 sek. Tež Lea Krječmarjec doby holče wubědźowanje a to we wysokoskoku z přeskočenymi 1,51 m. Nimo tuteju disciplinje wubědźowachu so šulerki hišće w kulostorku, dalokoskoku, mjetanju hlebje, w běhu na 800 m a w staflowym běhu. Cyłkownje docpěchu šulerki SGB 6495 dypkow a pojědu klětu na sakske krajne finale do Kamjenicy. Tam wjele wuspěcha.

Kónčny staw šulskeho lochkoatletiskeho wubědźowanja “Młodźina trenuje za olympiju” w holčej starobnej klasy II :

1.       Serbski gymnazij Budyšin

6495 dypkow

2.       Gymnazij Scholl Lubij

6364 dypkow

3.       Foucaultowy gymnazij Wojerecy

6362 dypkow

4.       Schleiermacherowy gymnazij Niska

5984 dypkow

5.       WŠ Komenskeho Mikow

5802 dypkow

6.       WŠ Pestalozzija Großschönau

5241 dypkow