Ekskursija do coologiskeje zahrody w Liberecach

Štwórtk, dnja 5. junija 2014, přewjedźechu šulerjo čěšćiny ekskursiju do coologiskeje zahrody w čěskich Liberecach, zo bychu tam projekt wo zwěrjatach přewjedli a sej tak mjena zwěrjatow w čěšćinje lěpje spomjatkowali a nawuknyli. Zetkachmy so rano w sedmich na Budyskim dwórnišću a jědźechmy z ćahom do čěskeho města. W ćahu mějachu šulerjo hižo tón abo tamnu składnosć, so z druhimi sobujěducymi w čěšćinje rozmołwjeć.

W Liberecach dojědźechmy sej z tramwajku k coologiskej zahrodźe. Po rozdźělenju do dźěłowych skupinow dóstachu šulerjo plan zwěrjenca, do kotrehož dyrbjachu pomjenowanja zwěrjatow w čěskej rěči zapisać. To běše zdobom wubědźowanje skupinow z cilom, najwjace mjenow bjez zmylka prawje do lisćiny zapisać a sej tak myto wudobyć. W zwěrjencu w Liberecach móže sej zajimowany wopytowar woprawdźe tójšto zwěrjatow wobhladać: maja tam mjez druhim elefanty, pinguiny, sowy a samo lawy. Najwjetša wosebitostka w Liberecach pak su běłe tigry, kotrež zrědka hdy w druhich zwěrjencach wuhladaš.

Při kiosku dyrbjachu so šulerjo wospjet w čěšćinje wuspytać, tónraz při skazanju jědźe. Wosebje woblubowane běchu „hranolky“ (pomfritki), „párek v rohlíku“ (Hot dog) a „smažený řízek“ (rězk).

Po třoch hodźinach w zwěrjencu podachmy so z tramwajku zaso na dwórnišćo a wottam z ćahom wróćo do Budyšina.

A kotra skupina je wubědźowanje wo čěske pomjenowanja zwěrjatow dobyła? Wšitcy su dobyli, dokelž su wšitcy pilnje dźěłali a sej mjena swědomiće zapisowali. Jako myto kiwaše šulerkam a šulerjam šokolodźana medalja “Fidorka” a diplom z wobrazom běłeho tigra, symbolom zwěrjenca w Liberecach.

k-DSC03399.JPG k-DSC03418.JPG k-DSC03470.JPG

.