1. serbska kulturna brigada z.t.

předsydstwo towarstwa:

Sylwija Rječcyna, Franciska Hojerjowa, Friedemann Böhme a Manja Bujnowska

wuměłski nawoda:

Friedemann Böhme

nawoda měšaneho chóra:

Friedemann Böhme

nawodnica rejowanskeje skupiny:

Constance Wendisch, Sylwija Rječcyna

nawodnica hercow/ nawoda skupiny dudakow:

Jan Chlebniček, Steffen Kostorcz

25. januar 1949 je dźeń załoženja 1. serbskeje kulturneje brigady. Wona wuńdźe ze serbskeho młodźinskeho hibanja po druhej swětowej wójnje a je zwjazana z wuwićom prěnjeje gymnazialneje šule serbskeho ludu. Natwarjejo na kulturne tradicije šulskeje młodźiny wobsteji brigada dźensa z měšaneho chóra, rejowanskeje skupiny a skupiny ludowych hercow. Někak 80 młodostnych w starobje 12 do 18 lět su sobustawojo kulturneho ćělesa, kiž so kóždu srjedu a někotryžkuli kónc tydźenja a w lětnych zwučowanskich lěhwach w mjenowanych spartach schadźuja.

1. serbska kulturna brigada wěnuje so w prěnim rjedźe pěstowanju a šěrjenju serbskeho hudźbno-kulturneho herbstwa a načasneje hudźbneje literatury. Do jeje repertoira słušeja pak tež ludowe a wuměłske spěwy słowjanskich susodow a němske klasiske a moderne twórby. Wosebite wjerški za šulerjow a nawodow w poslednich lětach: 2006 předstaji so prěni serbski rockowy oratorij w Smochćicach, „Wětrnik a časy“, na kotrymž nimo orchestra SLA chór a rejwanska skupina brigady sobuskutkowaštaj.

K 60. róčnicy załoženja Serbskeho gymnazija 2008 předstaji 1. kulturna brigada prapremjeru: "Łužiskoserbsku bjesadu " Bjarnata Krawca zhromadnje ze chórom, z rejwarjemi a ze skupinu hudźbnikow/ dujerjow. A nazymu samsneho lěta spěwaše chór brigady zhromadnje z tachantskim chórom Rachmaninowe „Wšonócne modlenje“ w Budyskej tachantskej cyrkwi. Na najwšelakoriše koncerty přiwabja kulturna brigada připosłucharjow w dwurěčnej Łužicy, ale tež za hranicami. Tak na přikład zarjaduje so brigada do tradicionalnych nazymskich a hodownych koncertow, přeprošuje so ke kulturnym wjerškam wosadow a gmejnow, je sobuorganizator beneficnych koncertow a wobdźěli so na chórowych wurisanjach. Trójce bu brigada we wobłuku "Młodźina hudźi" ze Sakskeje do Badensko-Württembergskeje delegowana. Kóžde 4 lěta poda so 1. kulturna brigada na wjetšu turneju; tak poby chór 2007 w francoskim měsće Dreux, partnerskim měsće Budyšina a 2011 pola Ladinow w Južnym Tirolu.

1. serbska kulturna brigada wuznamjeni so 1972 z mytom Ćišinskeho druheje rjadownje a 1997 z mytom Domowiny za dorost.

.