Dźeń wotewrjenych duri z nowym konceptom

Wutoru, 15. nowembra 2016, wotmě so kóždolětny dźeń wotewrjenych duri Serbskeho šulskeho a zetkawanskeho centruma w Budyšinje. Pod hesłom „Šulu dožiwić“ njebě wopytowarjam jenož móžno do fachowych rumnosćow pohladnyć, ale tež sami wučbu sobu dožiwić. Hłowny zaměr běše, rozdźěle mjez maćernorěčnej a bilingualnej wučbu pokazać. Po kóždej tajkej wučbnej hodźinje běše stajnje móžno, z wučerjemi a tež ze šulerjemi do rozmołwy přinć a prašenja stajeć.

Runočasnje běše w awli kulturny program, na kotrymž so mjez druhim cuze rěče a orchester předstajichu. Wobsteješe tež móžnosć, so na wjedźenjach po šulskej ležownosći wobdźělić, so k móžnemu šulskemu pućej poradźować dać, cyłodnjowske poskitki zeznać, internat a biblioteku wopytać a nazhonić, kak su šulerjo we wukraju přebywali.

Cyłkownje je so tutón nowy koncept dnja wotewrjenych duri derje poradźił a měješe jara dobry wothłós.

Daniel Matik

k-DSC_0487.JPG k-DSC_0502.JPG k-DSC_0503.JPG k-DSC_0532.JPG