(Projekt: Wučbna šćežka k serbskemu žiwjenju we Warnoćicach 1945-1950) Dnja 21.3.2024 wopytachu mały chór, rejwanska skupina a hrajerka dudow Elnette pod nawodom knjeni Škodźineje, knjeni Rječcyneje a knjeni Štilleroveje naš partnerski gymnazij we Warnoćicach. Zaměr wopyta běše, našim čěskim přećelam serbsku hudźbu zbližić. Elnette zahaji koncert na dudach ze spěwom „Ty sy tajka wikotata“. W rjanej serbskej drasće móžeše tak nimo tutoho wosebiteho hudźbneho instrumenta tež tutu staru serbsku tradiciju předstajić. Mały chór zanjese potom serbske, němske, ale tež čěske a jendźelske spěwy. Naša rejwanska skupina, kotraž hakle wot septembra 2023 eksistuje a kotraž swjećeše swoju premjeru hižo na Schadźowance, móžeše nětko druhi króć zjawnje reju na spěw „Kejžor Korla Wulki“ z oratorija Hrodźišćo prezentować a žněješe ekstra sylny přiklesk. Po tym přińdźe hišće raz Elnetta na jewišćo a zahra spěw wo šewcu. Naši šulerjo rozžohnowachu so ze spěwom „Budyšin“ a přeprosychu z tym zdobom čěsku partnersku šulu k nam do Łužicy. Moderaciju zarjadowanja w čěskej rěči přewzaštaj Valentina a Lucian Šołćic. Po słódnym wobjedźe w šulskej mensy podachmy so połni rjanych zaćišćow zaso na domojjězbu. Dźakujemy so knjeni Piňosovej a knjezej Lorencej ze Serbskeho instituta w Budyšinje, kotryž je tutón koncert financował. Koncert bě dźěl projekta, kotryž ma žiwjenje a studij serbskich šulerjow po 2. swětowej wójnje we Warnoćicach předstajić a kotryž podpěruje so wot Němsko-čěskeho fondsa přichoda a Załožby za serbski lud.
PhDr. Jana Štillerová
