Ekskursija do Prahi: Njezapomnity dyrdomdej za 8. lětnik

Wot 1. do 2. oktobra 2024 přewjedźechu šulerjo čěšćiny 8. lětnika napjatu ekskursiju do Prahi. Jězba zahaji so z ćahowej jězbu z Budyšina do Libereca, sćěhowana wot komfortabelneje busoweje jězby z Regiojetom z Libereca do Prahi. Šulerjo běchu połni předwjesela na wuslědźenje čěskeje stolicy.

Do Prahi dojěwši, wužichu šulerjo podzemsku železnicu a tramwajku, zo bychu so w měsće dale pohibowali. Jeje přebytk bě hostel Franz Kafka, kiž bě w starym měsće, cyle blisko sławneho Staroměšćanskeho koła w židowskej štwórći. Tute centralne połoženje zmóžni šulerjam, město přijomnje wotkryć.

Wažny wobstatk ekskursije bě prezentacija, kotruž běchu šulerjo we wučbje přihotowali. Kóždy šuler bě zajimawostku na kralowskim puću wuzwolił a tutu w přednošku předstajił. Tute prezentacije buchu filmowane, zo bychu film wo Praze zestajeli, kotryž dokumentuje dožiwjenja a wědu šulerjow.

Kulinariske dožiwjenja tohorunja překrótko njepřińdźechu. K wječeri wopytachu šulerjo hosćenc Korona, hdźež mějachu móžnosć, swoje jědźe sami skazać. Nazajtra zesylnichu so w pjekarni Antonínovo, hdźež tohorunja swoje skazanki snědanje sami spušćichu. Tute nazhonjenja njespěchowachu jenož samostatnosć šulerjow, ale pruwowachu tež znajomosće čěšćiny.


Druhi dźeń steješe wopyt Petřínoweje wěže na programje. Bohužel powjaznica dla hladanskich dźěłow zwonka dźěławosće njebě, tak zo dyrbjachu šulerjo cyłu horu pěši krosnować. Petřínowa wěža, kotraž je napodobnjena z Eiffelowej wěžu w Parisu, skićeše dych wotražacy wuhlad na Prahu. Bohužel bě dźeń wot kurjawy charakterizowany, štož wid trochu wobmjezowaše, přiwšěm běchu šulerjo zahorjeni wo wuhledźe a napinanju, kotrež běchu na so wzali.

Posledni programowy dypk bě wopyt špiheloweho labyrinta. Špihele reflektowachu wopytowarjow ze wšelakich perspektiwow, štož wjedźeše k lóštnym a překwapjacym wokomikam. Šulerjo móžachu so sami we wšelakich wulkosćach a formach widźeć, štož wjedźeše husto k smjeću a zadźiwanju.

Ekskursija skónči so z wróćojězbu do Budyšina, zaso z busom a ćahom.

Cyłkownje bě ekskursija do Prahi połny wuspěch. Šulerjo njemóžachu jenož wjele wo stawiznach a kulturje města wuknyć, ale tež swoje teamowe dźěło a prezentaciske kmanosće dopokazać. Dopomnjenki na tutu jězbu zawěsće hišće dołho we hłowach šulerjow wostanu.



PhDr. Jana Štillerová

Wot 19. do 20. septembra 2024 wotmě so 8. Bohemiada – olympiada čěskeje rěče – w Marijinym dole. Tute zarjadowanje, kotrež so kóžde druhe lěto přewjedźe, dyrbješe koronapandemije dla jónu wupadnyć. Prěnja bohemiada bu před 18 lětami w Žitawje zrodźena a je so wot toho časa k wuznamnemu wubědźowanju za šulerjow wuwiła, kotřiž čěšćinu wuknu.

Lětsa wobdźělichu so gymnazije ze wšelakich městow kaž Pirny, Drježdźan, Sebnicy, Ochranow, Žitawa, Wodowych Hendrichec, Habrachćic, Lubija, Dippoldiswalde a Budyšina na wubědźowanju. Konkurenca bě wulka a na wobdźělnikow čakachu wšelake discipliny. K nadawkam słušachu rozumjace słuchanje, zhotowjenje wideja k wěstej temje kaž tež dialogi z čěskimi šulerjemi, kotřiž běchu ze šule w Turnovje přijěli.

Z našeje šule, Serbskeho gymnazija Budyšin, staj so dwaj šulerjej na tutym napjatym wubědźowanju wobdźěliłoj. Annelie Kummer z rjadownje 8-3 móžeše sej w kategoriji A1 prěnje městno zawěsćić, mjeztym zo wobsadźi Frido Malink z rjadownje 10-1 druhe městno w kategoriji A2 +. Tute wuběrne wukony su dopokaz za angažement a rěčne znajomosće našich šulerjow.

Organizacija wubědźowanja bu wot fachoweje poradźowarki za čěšćinu, knjeni Palowski, a referentki LaSuB w Šwikawje, knjeni Klierowej, přewzate. Spožčenje mytow wotmě so w swjatočnym ramiku, při kotrymž konsul Čěskeje republiki, knjez Josef Špánik, knjez Eckert ze Sakskeho kultusoweho ministerstwa a šulski nawoda wyšeje šule w Turnovje wobdźělnikow z krótkimi narěčemi postrowichu.

8. Bohemiada njebě jenož wubědźowanje, ale tež wulkotne dožiwjenje, kotrež kulturelne a rěčne zwiski mjez Němskej a Čěskej skruća. Smy hordźi na našeju wobdźělnikow a wjeselimy so hižo na přichodnu olympiadu čěšćinarjow.

PhDr. Jana Štillerová

W Sakskej woli so 1. septembra 2024 nowy krajny sejm. Na tutym dnju maja wšitke wólbokmane wobydlerki a wobydlerjo wot 18 lět prawo,sobu postajeć, kotre strony, kotre politikarki a politikarjo přichodne pjeć lěta wo zakonjach w Sakskej wuradźuja, wothłosuja a z tym politiku postajeja.

Paralelnje k wólbam krajneho sejma wotměwaja so w Sakskej juniorowe wólby 2024. Tak tež na Serbskim gymnaziju. Tu stanje so wot 26.-30.08.2024 wólbna simulacija, pola kotrejež smědźa šulerki a šulerjo prěnje swójske nazhonjenja z wotběhami demokratiskich wólbow činić. Zaměr je na jednanje orientowane dožiwjenje a nawuknjenje demokratije.

Přihotujo zapołožichu šulerjo lětnikow 10-12 zapis wolerjow a rozdźělichu wólbne zdźělenki sobušulerjam z 9.-12. lětnika. Dale so wólbne předsydstwa wutworichu, kiž wólbny wotběh organizowachu a na to dźiwachu, zo wostanu wólby fairne.

Dale su so šulerjo a šulerki we wučbje hižo ze wšelakimi stronami zaběrali, kotrež k wólbam nastupja. Štó ma kajke stejišćo k temam, kotrež su młodostnym wažne? Štó chce što docpěć, hdyž so do Sakskeho krajneho sejma woli?

Wot 26.08.2024 so woli a mnozy šulerjo wobdźěleja so na juniorowych wólbach.

Wutrobny dźak wuprajimy wšěm tym, kotřiž su wólbne zdźělenki adresowali, zapis wolerjow wupjelnili, wólbne wobdźělenja a hłosowanske lisćiki wuličili a wólby wobkedźbowali.

knj. Delanowa