Serbski gymnazij Budyšin

Chórowe a rejwanske lěhwo w Połpicy (12.– 14. měrca 2025)

21. März 2025

Tři intensiwne a inspirěrowace dny dožiwichu šulerki a šulerjo Serbskeho gymnazija w Budyšinje.  W idylisce ležacej Lěsnej młodowni w Połpicy zeńdźe so 44 młodych spěwarkow a spěwarjow, zo bychu pod nawodom knjeni Škodźinje a z podpěru knjeni Wowčerjoweje nowe spěwy nazwučowali.  Woni dźěłachu koncentrowani na hrach we wšelakich rěčach, kotrež chcychu pozdźišo na wopomnjenskim zarjadowanju 28. apryla w Chrósćicach kaž tež na nazymskim koncerće w Liberecu prezentować.

Paralelnje trenowaše 12 zahoritych rejwarkow a rejwarjow z wjele angažementom za rejwanske wubědźowanje w Praze spočatk meje kaž tež za tradicije bohaty folklorny festiwal w Chrósćicach w juniju.  Naročne choreografije buchu wot knjeza Kolembusa, nazhoniteho choreografa a rejwanskeho pedagoga, zhromadnje ze swojej žonu Yuliyu nazwučowane.  Intensiwne dźěło na probu nježadaše jenož disciplinu a koncentraciju, ale činješe wšitkim wobdźělenym tež wulke wjeselo.

Nimo probow zwosta dosć chwile za zhromadne wočerstwjenje a towaršliwe wječorki, na kotrychž wobdźěleni hromadźe spěwachu, smějachu so a nowe přećelstwa nawjazachu.  Atmosfera bě wot teamoweho ducha, wjesela na hudźbje a zahoritosće za reju charakterizowana.

Tři dny połne hudźby, reje a zhromadnosće – njezapomnity čas, kotryž wšitkim dołho w pomjatku wostanje!

Šulscy sanitetarjo pola nas na gymnaziju

12. März 2025

Wot spočatka tutoho šulskeho lěta přewjedźe so na Serbskim gymnaziju w Budyšinje cyłodnjowski poskitk “Šulscy sanitetarjo”, na kotrymž so dźewjeć šulerjow a šulerkow wot 5teho do 11teho lětnika wobdźěla. Dźěłarnička je přeco pjatk w sedmej hodźinje a nawjeduje so wot knjeni Wünsche, kotraž dźěła pola Johanniterow. Dnja 7.3.25 běše za wobdźělnikow wosebity dźeń, na kotrymž přewjedźechmy k prěnjemu razej cyłodnjowske zwučowanje. Dokelž smy sej zastaranje ranow hižo nadźěłali, ležeše fokus tutoho dnja skerje na spóznaću móžnych nuzowych situacijow a kak móžemy pacientej w tajkej situaciji pomhać. To su na přikład spóznaće chorosćow w mozach kaž boža ručka, střasenje mozow, wopalenje wot słónca abo horcoty abo tež epilepsija. Ale tež chorosće w hrudźi kaž astma, zasrěbnjenje, infarkt wutroby, hyperwentilacija a zranjenje hrudźe smy spóznać nawukli a nětko wěmy, kak móžemy we wotpowědnej situaciji pomhać a što mamy činić. Highlight na kóncu běše potom reanimacija a nawuknjenje praweho wobchadźenja z defibrilatorom.

Cil tuteje AGje je wukubłanje šulskich sanitetarjow, kotřiž potom tež při njezbožach na šuli wupomhaja a tak zastaranje šulerjow z wukubłanymi pomocnikami prěnjeje pomocy polěpša.

Lucian Šołta, 9-3