Wot 19. do 20. septembra 2024 wotmě so 8. Bohemiada – olympiada čěskeje rěče – w Marijinym dole. Tute zarjadowanje, kotrež so kóžde druhe lěto přewjedźe, dyrbješe koronapandemije dla jónu wupadnyć. Prěnja bohemiada bu před 18 lětami w Žitawje zrodźena a je so wot toho časa k wuznamnemu wubědźowanju za šulerjow wuwiła, kotřiž čěšćinu wuknu.
Lětsa wobdźělichu so gymnazije ze wšelakich městow kaž Pirny, Drježdźan, Sebnicy, Ochranow, Žitawa, Wodowych Hendrichec, Habrachćic, Lubija, Dippoldiswalde a Budyšina na wubědźowanju. Konkurenca bě wulka a na wobdźělnikow čakachu wšelake discipliny. K nadawkam słušachu rozumjace słuchanje, zhotowjenje wideja k wěstej temje kaž tež dialogi z čěskimi šulerjemi, kotřiž běchu ze šule w Turnovje přijěli.
Z našeje šule, Serbskeho gymnazija Budyšin, staj so dwaj šulerjej na tutym napjatym wubědźowanju wobdźěliłoj. Annelie Kummer z rjadownje 8-3 móžeše sej w kategoriji A1 prěnje městno zawěsćić, mjeztym zo wobsadźi Frido Malink z rjadownje 10-1 druhe městno w kategoriji A2 +. Tute wuběrne wukony su dopokaz za angažement a rěčne znajomosće našich šulerjow.
Organizacija wubědźowanja bu wot fachoweje poradźowarki za čěšćinu, knjeni Palowski, a referentki LaSuB w Šwikawje, knjeni Klierowej, přewzate. Spožčenje mytow wotmě so w swjatočnym ramiku, při kotrymž konsul Čěskeje republiki, knjez Josef Špánik, knjez Eckert ze Sakskeho kultusoweho ministerstwa a šulski nawoda wyšeje šule w Turnovje wobdźělnikow z krótkimi narěčemi postrowichu.
8. Bohemiada njebě jenož wubědźowanje, ale tež wulkotne dožiwjenje, kotrež kulturelne a rěčne zwiski mjez Němskej a Čěskej skruća. Smy hordźi na našeju wobdźělnikow a wjeselimy so hižo na přichodnu olympiadu čěšćinarjow.
PhDr. Jana Štillerová
