Njezapomnity dźeń za 6-1
17. decembra 2024 bě skónčnje tak daloko: Šulerjo 6-1 našeje šule přijachu swojich čěskich partnerow z gymnazija we Warnoćicach. Tuta wuměna bě wosebje napjata, dokelž běchu čěscy šulerjo lětsa z wučbu němčiny započeli, mjeztym zo maja naši šulerjo tohorunja swoje prěnje hodźiny čěšćiny zasobu. Tole wjedźeše drje k někotrym wužadanjam w komunikaciji, kotrež dyrbjachu so husto přez gestiku a mimiku wudospołnjeć, tola šulerjo zmištrowachu tutu situaciju z brawuru. Zdźěla móžachu so tež jendźelsce dorozumić, štož skićeše witanu składnosć, prěnju cuzu rěč aktiwnje nałožować.
Wopyt zahaji so z wodźenjom po šuli, na kotrymž dóstachu čěscy hosćo dohlad do wšědneho dnja na našej šuli. Po tym stejachu zeznawanske hry na programje. Bě rjenje widźeć, kak spěšnje so spočatna strachoćiwosć přewiny a zhromadne smjeće a wjeselo mjez šulerjemi přiběraštej.
Wažny dypk wopyta bě pisanje listow na partnerow we wotpowědnje maćeršćinje. Tute listy so pozdźišo we wučbje předčitaja a wuhódnoća, štož njeměło jenož zrozumjenje spěchować, ale tež zakładny kamjeń za dalše dopisowanje być.
Wšitcy hromadźe dźěchmy potom na Wjacławske hodowne wiki, hdźež móžachu šulerjo w měšanych skupinach město zeznać. To njespěchowaše jenož zhromadnosć, ale tež interkulturelne dorozumjenje. Zhromadne foto před swjedźensce wupyšenym hodownym štomom tworješe rjane zakónčenje dnja.
Zetkanje wjedźeše k nowym přećelstwam, a mnozy šulerjo wuměnichu sej mjez sobu telefonowe čisła, štož předwjeselo na přichodny wopyt jenož hišće stopnjowaše.
Wjeselimy so hižo na projektowy tydźeń w nalěću, hdyž smě naša 6-1 čěskich šulerjow we Warnoćicach wopytać. Tuta wuměna njeje jenož rěčne znajomosće spěchowała, ale nadźijomnje tež zrozumjenje a přećelstwo mjez susodnymaj narodomaj skrućiła.
J.Štillerová
